ORANJESTAD (AAN): Durante un conferencia di prensa di fraccion di MEP Dialuna mainta, parlamentario Endy Croes a duna pabien na e equipo masculino di softball fast pitch cu a participa na Colombia na e campeonato ‘CONSURTA’, cu aunque nan no a clasifica pa e finalnan di e torneo, a gana 3 wega.
Den e torneo cu Venezuela na final a gana, tin peloteronan Arubiano cu a destaca y a gana premio.
Tabata tin 11 pais cu a participa pa un total di mas di 200 atleta y na final e organizacion a duna premionan na e hungadornan cu mas a destaca durante e torneo.
Croes a indica cu Filbert Tiel di Aruba a gana e premio di mihor hungador di outfield, Kelvin Silvania tambe di Aruba a gana e premio di mihor primera base, mientras cu Jason Orman a bira e mihor hungador di infield.
Banda di esaki Jeandrick Laclé a Sali na di dos lugar pa loke ta e hungadornan cu mas careda a impulsa.
E tabata tin un total di 10 RBI.
E parlamentario a bisa cu e ta orguyoso di peloteronan di Aruba, pa e logronan individual y pa e hecho cu nan a duna bon bataya contra e equiponan fuerte cu a participa.
Segun Croes, esaki ta stimula otro deportistanan di Aruba den cualkier ramo pa tambe kier yega leu.
Deporte ta yuda crea caracter y disciplina den nos muchanan, pa asina kita nan for di caya pa nos por yuda Aruba bay dilanti, segun e parlamentario.
