Home Enseñanza A.T.A. a sinta cu Raad van Kinderen den sesion di dialogo

A.T.A. a sinta cu Raad van Kinderen den sesion di dialogo

17
0
SHARE
- Advertisement -

ORANJESTAD  (AAN) – Pa di tres aña consecutivo Aruba Tourism Authority (A.T.A.) ta participa den e proyecto ‘Raad van Kinderen’. E iniciativa di Prinses Laurentien di Hulanda hunto cu fundacion ‘Missing Chapter’ y UNICEF tin como obhetivo pa laga muchanan asumi un papel mas activo den e desaroyo di ideanan pa yuda compania y sectornan local.

Durante aña escolar 2017-2018, studiantenan di Prinses Amalia School a haya e tarea (dilema) ‘Con A.T.A. por percura pa nos isla por sobresali riba e tereno di servicio cu nos ta duna na nos huespednan?’ Nan a haya un presentacion y splicacion di e tema den cual, entre otro, a papia riba e retonan nobo pa loke ta energia, cuido y medio ambiente entre otro. Esaki ta rekeri tambe pa pensa riba solucionnan nobo pa nos isla y pa mira e cosnan for di un perspectiva diferente. Fundacion Missing Chapter y UNICEF ta kere cu hustamente nos studiantenan por yuda nos sociedad danki na nan perspectiva unico, preguntanan skerpi y tambe logica. Ademas nan ta di opinion cu e muchanan tambe ta stakeholders di nos comunidad cu tin derecho pa duna nan opinion riba asuntonan cu ta determina nan propio futuro.

Den lunanan di maart/april/mei y juni – como parti di e investigacion, e studiantenan a laga nos turistanan yena un encuesta como tambe nan a bishita nos aeropuerto pa nan wak e prome como tambe e ultimo impresion cu nos turistanan ta haya ora di yega y sali f’e Aruba.

E resultadonan di e encuestanan a wordo trata prome cu vakantie grandi, unda A.T.A. a asisti na e ‘Sesion di Dialogo’ caminda e muchanan a trece dilanti e conseho y conclusionnan cu nan a yega na dje.

E sesion a tuma luga na edificio di ATIA y tabata dirigi pa Marc-Benson Denz. Ehecutivonan di A.T.A. y CEO Ronella Tjin Asjoe-Croes a sinta hunto cu e grupo di 29 mucha cu, pa varios luna, a traha riba e tema bou coordinacion di juffrouw Crystal Kock.

Un di e puntonan cu a resalta for di e encuestanan ta, cu nos bishitantenan ta hopi satisfecho cu e servicio cu nos comunidad ta brinda na nan. Amabilidad ta un parti di e servicio duna y un sonrisa ta forma parti di esaki. Si no trata e turistanan cu amabilidad y cordialidad, nan no lo kier bolbe nos isla pa pasa nan vacacion. Cu otro palabra, nos ta y mester keda duna e turistanan un experiencia unico, unda nan ta sinti nan mes special y e sentimento aki mester wordo duna na e turista manera e yega nos isla te na momento cu nan bolbe nan pais.

Despues di e Sesion di Dialogo, den cual e studiantenan a trece nan idea y sugerencianan dilanti, directiva di A.T.A. y di ‘Raad van Kinderen’ a sinta hunto pa analisa e informacion obteni y con por implementa esaki den e plannan existente of riba termino corto. Tawata impresionante pa mira e prestacion/interes di e muchanan y e puntonan presenta durante e Sesion di Dialogo. E oportunidad ta uno cu ehecutivonan a probecha pa reta e muchanan haciendo preguntanan al caso cu a keda bon contesta.

Cada aña ta scoge un school basico/preparatorio na Aruba unda e studiantenan ta participa den e proyecto ‘Raad van Kinderen’ conociendo un industria of organizacion local y ta haya e tarea di formula solucionnan pa un dilema en particular. A.T.A. ta kere y ta sostene e proyecto firmemente ya cu ta brinda un plataforma den cual nos muchanan por amplia nan conocemento riba nos industria turistico, y e oportunidad pa participa activamente desaroyando nan sinti di responsabilidad civico.

- Advertisement -

DUNA COMENTARIO

Please enter your comment!
Please enter your name here