Home Gobierno Despues di investigacion Gobierno lo tuma pasonan penal si wordo proba cu...

Despues di investigacion Gobierno lo tuma pasonan penal si wordo proba cu tabata tin ilegalidad den Cuenta Anual 2017

296
0
SHARE
- Advertisement -

Prome Minister Evelyn Wever-Croes:

ORANJESTAD  (AAN):  Directie Financiën siman pasa e entrega e cuenta anual di pais Aruba pa aña 2017. Esaki ta e ultimo cuenta anual cu ta cay bou di auspicio di Gabinete Eman II di AVP cu ta indica con nan a gasta e fondonan durante e aña. Prome Minister Evelyn Wever-Croes a relata loke Directie Financiën a indica den e cuenta anual aki.

Directie Financiën a cuminsa ta indica cu e deficit a sali na 117 miyon florin cua ta hopi mas halto cu e norma cu e mester tabata cu ta 25 miyon florin. Esaki ta 92 miyon florin mas. Den percentahe e deficit lo mester tawata 0,5% pero el a sali 2,4%. Esaki a causa cu e debe a yega 4197 miyon florin na aña 2017 cu ta 86.8% di nos GDP.

E informacion aki di e Cuenta Anual 2017, Prome Minister a duna di conoce cu ta confirma e situacion financiero preocupante cu Gabinete Wever-Croes a hereda. Un situacion preocupante na unda e Gobierno actual a bin ta encontra cifranan irealistico. Un deficit cu mester tabata na 25 miyon florin pero a wordo laga na 117 miyon florin ta motibo pa preocupa cu a duna motibo pa kico Gobierno actual mester a tuma e pasonan doloroso pero firme pa soluciona e problemanan financiero di nos pais y coregi e rumbo cu nos pais tabata aden. Pasonan pa gana e credibilidad financiero bek di nos pais.

Directie Financiën a indica cu a gasta mas di loke cu a wordo presupuesta. Mita di e 117 miyon florin aki a bay na gastonan di personal adicional cu e gobierno anterior a tuma den curso di aña di eleccion. Tambe a indica un gasto enorme na huurmento di MFA cua tabata desicionnan financiero sumamente iresponsabel cu e gobierno di AVP mes no a tene cuenta cu ne den nan presupuesto. Tambe tabatin e gasto di mercadeo y propaganda na unda tambe a wordo gasta sumamente hopi especialmente den temporada di eleccion. Na aña 2013, Gabinete Eman a haci mescos.

Prome Minister a duna di conoce cu awo e Cuenta Anual 2017 ta bay Contraloria General di Aruba (Algemene Rekenkamer) na unda lo haci un investigacion riba e cuenta anual pa aña 2017 cu ta cay bou di e Gobierno di AVP.

“Lo bay investiga si e desicionnan tuma door di Gabinete Eman a surpasa y cu cuanto placa y si esaki ta legitimo. Lo investiga si a tuma hende den servicio, regala contractnan pa campaña pa gana voto, cua ta un acto ilegal cu consecuencia cu lo sigui un investigacion penal. Gobernantenan no por biba pensa cu nan ta abusa di fondo di pueblo pa cumpra voto pa purba influencia un eleccion y sali liber di esaki”.

Despues e Cuenta Anual ta bay Parlamento pa debati riba dje despues cu e resultadonan di Contraloria General indica si tabata tin actonan ilegal of no. Si tur e desicionnan cu a wordo tuma ta hustifica cu pruebanan, Gobierno e ora ey lo tuma e pasonan necesario.

“Aruba awo tin un Parlamento y Gobierno diferente cu ta tuma esaki na serio y despues cu e raport bin for di Contraloria general lo dicidi locual nos lo mester haci y tuma e pasonan penal si ta necesario”, Prome Minister Evelyn Wever-Croes a expresa.

- Advertisement -

DUNA COMENTARIO

Please enter your comment!
Please enter your name here