Home Gobierno E gobierno aki no ta bay privilegia ningun contratista en particular

E gobierno aki no ta bay privilegia ningun contratista en particular

127
0
SHARE
- Advertisement -

Minister Glenbert Croes: Ainda no a elimina tur acto coruptivo den DPL

ORANJESTAD (AAN): Durante di ausencia di minister Glenbert Croes, tabata tin un rumor ta core rond cu e lo a duna permiso na 12 trahado Venezolano.

E minister a refuta cu esey no ta berdad. Tambe e ta haci uzo di e rumor pa e atende un tiki pa corda contratistanan local, cu a wordo tuma door di empresarionan di exterior y tambe pa e empresanan cu ta bay bin di afo tambe, pa nan ta alerta.

Politica di gobierno ta pa loke ta trata y ta spera cu e refineria habri. Refineria pa brinda Aruba y su trahadonan un futuro, pero kier pa tur hende compronde, cu pa gobierno ta importante, pa e trahadonan local, yiunan di tera, Arubiano, nos profesionalnan, contratistanan local, cu ta traha cu trahadonan local. Tin un paar di contratista na Aruba cu kier duna cinco yiu di tera trabao, pa trece cincuenta di afo. Esey ta inaceptabel.

Tin algun contratista local cu a paga masha hopi pa ontheffing durante gobierno anterior y nan kier bin plama e redashi aki. Bo tin algun ehecutivo, ex di Valero cu awor aki a bira empresario, cu tin hopi aña na Aruba, cu tambe kier plama e cosnan aki.

E era di corupcion di gobierno di AVP den loke ta trata DPL, e era di corupcion ey a caba. E minister no ta corupto. Awo realidad ta cu minister anterior di AVP, ta bao di investigacion. E realidad ta cu ta un organisacion criminal di corupcion tabata tin ta efectua e corupcionnan aki y tin cu reconoce cu te ainda no ta tur e corupcion, e actonan coruptivo a wordo elimina.

Te ainda no ta tur e figuranan cu ta participe na e practica di corupcion di gobierno anterior, ainda activo den e actonan ey, no a logra elimina tur. No a logra gara tur, no a logra castiga tur, pero ta bay tras di tur.

E mandatario a uza e oportunidad pa manda un mensahe pa contratistanan local. Bo ta un contratista local ora cu mirabo traha cu trahadonan local. No kere cu bo ta bay duna cinco Arubiano trabao, pa bo trece cincuenta trahado di afo. Bo no ta haya cooperacion di gobierno. E minister a ehecuta un di e medidanan cu el a bin cun’e ultimamente, cual ta percura pa tur decision mester bay cerca minister.

Tur decision relaciona cu DPL, mester bay cerca minister. E no ta cerca e management team mas tampoco. E kier tin e siguransa cu si tin cualkier funcionario di cua departamento cu ta, ta echa baina, na final e mester bay cerca e minister pa scrutin’e. Hopi biaha atabo ta duna mandato na departamentonan y ora cu bo ta kere cu ta e ministernan ta politico, tin hende den e departamento ta mas politico cu bo mes, kisas pa otro interesnan.

Gobierno no kier sirbi ningun interes aheno. Minister Croes kier pa tur hende sa tambe cu e Gobierno aki no ta bay privilegia ningun contratista en particular. E politica ta pa duna tur contratista un oportunidad igual pa brinda su servicio, pero atrobe, prome cos cu lo bay midi, ora cu contratistanan bin pidi permiso pa trece trahado di afo, cuanto Arubiano bo tin na trabao. Cuanto yiu di tera bo tin na trabao. A papia tanto di 80/20. Si ta 12 trahado di trabao di afo bo kier trece, ta spera cu bo tin 60 Arubiano na trabao.

E minister ta trece esaki como un reflexion. Ta bon pa bisa e cosnan manera cu nan ta, pasobra den e ultimo dos simannan aki tin contratistanan local, yiu di tera, cu a bati nan boca riba e redashi aki, cu Glenbert lo a duna permiso na 12 trahado di Venezuela, tabata tin contratistanan cu a bisa, cu nan por fix kico cu ta cu Glenbert.

E minister a menciona pa nan wanta duro, pasobra e ta tende y haya sa tur cos. Gobierno no ta duna ningun contratista e privilegio manera cu tin un paar cu a ricibi e privilegio durante di e gobierno anterior, fuera cu nan a paga pa ontheffing, pa nan so haya permiso pa haya trabao den refineria, e fiesta ey a caba.

Tur contratista ta haya un chens igual, basta cu bo ta cumpli cu e politica di gobierno pa duna trahadonan local, yiunan di tera, preferencia profesionalnan local, preferencia na contratistanan local cu ta traha cu trahadonan local.

Esey ta e politica di gobierno. Ora no tin un specialista of un trahado na Aruba pa haci trabao, e ora bo por haya permiso pa trece un hende di afo pa haci e trabao. Semper y cuando bo ta percura pa pone un local counterpart di bo propio organisacion banda di dje, pasobra kier pa tin un transferencia di conocemento. Kier pa yiunan di tera tambe crece den e posibilidadnan pa haya trabao.

- Advertisement -

DUNA COMENTARIO

Please enter your comment!
Please enter your name here