Home Hudicial Hof ta confirma 10 aña di prison pa Venezolano cu a haci...

Hof ta confirma 10 aña di prison pa Venezolano cu a haci serie di asalto arma

525
0
SHARE
- Advertisement -

E acusado awor ta sera na Hulanda y a laga sa cu e ta bolbe apela

ORANJESTAD (AAN): E Venezolano L.R.S. (34) cera na Hulanda, ayera mainta via Video Conference a scucha su sentencia caminda Hof di Corte Superior a confirma e sentencia di 10 aña di prison contra cual L.R.S. a apela. Na e mesun momento el a laga sa cu e lo apela e sentencia atrobe.

    Acusado hopi peligroso:

DIARIO por a compronde cu e motibo cu L.R.S. a wordo hiba Hulanda ta pasobra tabatin indicacion cu e lo a traha plan di huy for di KIA. E ta wordo considera sumamente peligroso. E tabata envolvi den cantidad di asalto arma y a wordo haya cu granada di man.

    Asaltonan arma:

Dia 25 di Juni 2018 tratamento di e apelacion a tuma lugar, camnda L.R.S. a wordo treci Aruba pa tratamento di e caso. Despues di e tratamento, el a wordo hiba bek Hulanda caminda e ta sera den un prison di maximo seguridad.

E acusacionnan contra L.R.S. ta:

  • Asalto arma na oficina di number na Pierdra Plat riba 24 Maart 2016.
  • Dia 27 Maart 2016, asalto arma na mini market Chines den Caya Betico Croes
  • Entre dia 24 Maart 2016 y April 2016, e tabatin arma di candela y un granada di man.
  • Dia 17 April 2016, asalto arma na un cas den Koningstraat. E mesun dia a menaza un persona den un auto cu arma y bay cu su cellular.

Dia 5 April 2017, Corte den Promer Instancia a condena L.R.S. na 10 aña di prison mientras cu Fiscal a exigi 14 aña di prison. El a apela e sentencia pasobra e ta para riba cu no tin nada di haci cu e asaltonan arma.

Pasa video den corte

A pasa video di seguridad durante tratamento di e caso den Corte Superior caminda por a mira un persona cu pechi di baseball cora y un otro. Ta bisa cu esun cu pechi cora ta e. Despues a pasa un otro video di seguridad den mini market caminda ta mira L.S.R. atrobe cu arma. Segun L.S.R. no ta e. Nan ta confundi cu otro persona.

Condena na venezuela

Segun L.S.R. ta normal na Venezuela pa ta arma. El a wordo deteni y condena pa posecion di arma. El a wordo condena na 7 aña pero nan a lag’e liber despues di 3 luna. Esey pasobra no tin suficiente lugar den prison. Pero e mester notifica cada siman na autoridad di Venezuela. El a dicidi di bay for Venezuela y bin Aruba. El a bisa cu door di e situacion na Venezuela, el a bay laga su famia atras en busca di mihor bida pa por mantene su famia.

El a reclama e trato cu e ta hayando. Ta parce cu nan ta considera como un criminal grandi pero e no ta asina.

Exigencia pg

PG a bisa cu ta L.S.R. a apela e sentencia. Fiscal a exigi 14 aña pero Hues a conden’e na 10 aña di prison. PG a bisa cu a base di reconoce L.S.R. riba potret y video di seguridad. Ademas tin hendenan cu reconoce L.S.R. pasobra nan tabata anda cune. L.S.R. ta pretende cu e no conoce nan pero PG ta haya cu e conoce nan masha bon. Na e cas na Tanki Leendert e tabata keda cu hendenan cu conoce bon. Nan tabata yam’e El Gocho of Feo. Na opinion di PG, por mira bon cla riba camera di seguridad con L.S.R. a menaza cu un pistol. PG a bisa cu hopi hende tin miedo di L.S.R. y no kier a declara contra di dje. Tin testigo cu a mira L.S.R. a hinca cos den e caha fuerte den e cas na Tanki Leendert y cu e granada di man ta di L.S.R.

Sentencia

Dialuna mainta Hues di Aruba a lesa e sentencia di Hof. Via Video Conference (VC) cu Hulanda a haci e sentencia. Por a mira riba e pantaya grandi den sala di Corte, con guardianan na Hulanda a trece e L.R.S. dilanti e screen di television caminda e ta mira Hues di Corte mientras cu e Hues di Corte ta mira L.R.S.

Hof su decision riba e apelacion ta cu a keda legalmente proba e serie di asaltonan arma, e posecion di arma di candela y granada di man.

Hof ta confirma e sentencia di 10 aña di prison. Hof a ordena cu e dos pistol y granada di man ta keda confisca. Ademas cu L.R.S. lo mester paga 1450 florin na e victima O. Hof a pone medida di pago y si L.R.S. no paga, e lo mester bay 29 dia di prison. Tambe Hof a ordena pa L.R.S. paga 1111 florin na e victima D. Tambe Hof a pone medida di pago.

Bolbe apela:

Por a nota cu L.R.S. no a keda contento cu e sentencia. Hues a bisa cu e tin derecho di apela e sentencia caminda Corte Supremo (6 Hues) lo evalua e caso. L.R.S. den un tono rabia a bisa cu e ta apela e sentencia. Awor e lo mester bay sigui e procedura caminda e lo mester busca asistencia di un abogado di Hulanda pa tratamento di e caso cual lo tuma lugar na Hulanda mes.

- Advertisement -

DUNA COMENTARIO

Please enter your comment!
Please enter your name here