Home Religion y Espiritualidad Nuncio Apostolico Fortunatus Nwachukwu contento cu su bishita na Aruba

Nuncio Apostolico Fortunatus Nwachukwu contento cu su bishita na Aruba

30
0
SHARE
- Advertisement -

“Un Diosesis na Aruba ta posibel”

ORANJESTAD   (AAN): Monsegnieur Fortunatus Nwachukwu ta Nuncio Apostolico cu a bishita Aruba. E ta representante di Papa Francisco. Durante su bishita a logra un entrevista cun’e tambe. El a splica cu hopi alegria el a bishita Aruba.

Como parti di Reino Hulandes, Aruba ta bao di e Nunciatura Apostolico di Hulanda. Pero e Nuncio ta cubri geograficamente, ta cubri e region aki como un delegado apostolico. E ta representa e Santo Tata como delegado apostolico, haciendo funcion di e Nuncio Apostolico den e region aki.

Cu hopi gusto el a yega Aruba, vooral pa e haci presente na e pueblo, e afecto, e cercania di papa Francisco y pa transmiti tambe na tur hende e bendicion di papa Francisco. E bendicion aki, e saludo aki di papa Francisco, ya el a transmiti’e diabierna mainta na e representantenan di clero, e Gobernadora Interino, y tambe na prome minister, como tambe e conseho di minister, saludando y gradiciendo na e atencion cu a wordo duna na Iglesia Catolico y expresando tambe e afecto di Su Santidad, papa Francisco.

E Nuncio tambe a expresa cu a yama su atencion e cercania cu ta existi entre e obispo di e iglesia aki, Monseigneur Luis Secco y e clero. Por mira cu e ta relaciona cu su sacerdotenan casi manera un ruman. Y asina nan por traha, combersa, intercambia idea y planifica hunto. Naturalmente Nuncio tambe a sinti su mes hopi acogi entre e sacerdotenan y tambe a samina, toca hunto e desafionan cu nan tin como sacerdote den iglesia local na Aruba.

E cuestion principal ta di haci tal pregunta kico ta 1199. 1199 ta 1 cu ta e prome buki di Reynan. 19, capitulo 9, versiculo 9. Unda cu Dios ta puntra Elias: “kico bo ta haci aki, pakico bo ta aki.” Ora cu un sacerdote por haci su mes e pregunta aki, e ora e por investiga bon pa e por sa pakico e ta na e luga eynan preciso. Kico ta su berdadero identidad, cual ta su funcion. Ora cu nos tin e puntonan aki ta, ta orienta tambe e formacion formal den e direccion aki y ta orienta tambe e formacion personal y permanente den e direccion aki.

Durante e conferencia di prensa, Nuncio Apostolico a sigui expresa, cu nan tey pa transmiti na hende, e persona di Hesus, e palabra di Hesus, e plan di Hesus. Ta Hesus mes ta invita nos. Nos sa e texto di evangelio, segun San Mateo capitulo 6, versiculo 33 cu Hesus ta bisa cu nos mester busca prome cu tur cos e reino di Dios, Nuncio a expresa.

E sacerdotenan ta transmiti Hesus, como tambe con pa transmiti e enseñansanan di Hesus, con pa transmiti e boluntad di Hesus. Esey ta loke Iglesia kier. Transmiti naturalmente un modo di papia general. Hesus a transmiti algo hopi importante. El a bisa cu e lo laga un mandamento nobo, cual ta stima otro. Stima bo prohimo manera bo mes. Nos mester corda cu esaki ta testament bieu. Testament nobo cu Hesus, nos tin un otro manera di stima. No mas stima bo prohimo manera bo mes, sino segun e mandamento nobo di Hesus, segun San Juan Capitulo 13, versiculo 34, stima otro manera “ami” Hesus, a stima. E ta stima manera Hesus.

 

Un Diosesis na Aruba ta posibel

Nuncio a comenta di a ricibi un carta na final di e misa diabierna, pero e no a habri e carta, mirando cu e tabata tin hende rond di dje. E no gusta habri un carta y lesa esaki rapidamente. El a conserva e envelopnan cu el a ricibi, cual e lo bay habri cu trankilidad y lesa nan.

Si ta papia di e posibilidad pa tin un obispo, un Diosesis na Aruba, ta posibel, si e condicionnan ta duna, dicon no. Pero mester cuminsa traha pa tin e condicionnan aki. Es decir, un evangelisacion renoba. E pregunta ta, ki ora a sali for di e parokianan e ultimo biaha un vocacion sacerdotal, ki ora a sali for di Aruba e ultimo biaha un vocacion na e bida religioso. Con e comunidadnan ta trahando hunto cu un sistema di colaboracion y cooperacion. Pa papia di of presenta na e Santo Tata e peticion pa tin un obispo, nos tin cu prepara e tereno. Trahando riba campo di renoba e evangelisacion, renoba e colaboracion entre e pastoornan y entre e fielnan y entre e comunidadnan. Ora nos tin e principionan aki, e tereno aki bon prepara, e ora por presenta cualkier peticion na Papa.

- Advertisement -

DUNA COMENTARIO

Please enter your comment!
Please enter your name here