ORANJESTAD(AAN)—Ayera un mega blackout (apagón) a laga 90 porciento di Caracas sin coriente.
Presidente di Corporacion Electrica di Venezuela, cu ta estatal, Luis Motta Dominguez, a informa cu e fayo a keda registra den poblacion di Santa Teresa del Tuy y den estado Miranda.
Entre e zonanan afecta pa falta di servicio electric, ta Los Ruices, Guarenas, Guatire, Los Samanes, Los Palos Grandes, Altamira, El Cafetal, El Marques, Palo Verde, La Trinidad, Baruta, Chuao, Las Mercedes, La Florida, La Castallena, La Candelaria, Plaza Venezuela, Petare, Santa Eduvigis, Valle Coche, El Silencio, Capuchinos, Capitolio, entre otro.
E blackout a registra tambe den estado Miranda, Vargas y den algun zona di Aragua.
E ministro di Electricidad, Luis Motta Domínguez a skirbi riba su cuenta Twitter cu “na e momentonan aki tin interupcion di servicio electrico den un 80 % di Caracas. E fayo tin su origen na Santa Teresa y ta trahando pa por repone e servicio”.
Entretanto, e diputado Juan Andrés Mejia a expresa cu “e apagon a extende den casi henter Caracas. Fayonan electrico tin den e 5 municipionan di e area metropolitana, incluso den estado Vargas”.
Debi na e blackout, telefonnan celular tambe a registra fayonan den señalnan di manera cu comunicacionnan tambe a keda afecta. E foto ta mustra biaheronan cu no por usa Metro tampoco ya cu esaki tambe mescos cu tur servicio a cay afo.
