Home Social Comision CASA ta invita comunidad na e podium dia 30 di Augustus...

Comision CASA ta invita comunidad na e podium dia 30 di Augustus venidero

49
0
SHARE
- Advertisement -

Ban para violencia na Aruba

ORANJESTAD (AAN) – Diamars atardi na altura di e brug di Lagoen, tabata tin un momento di reflexion, organiza pa Comision Accion Stop Abuso (CASA), bao encargo di sr. Marinus Wegereef hunto cu e damanan Jeanine Marsman y Magaly Maduro (director di Fundacion pa Hende Muher den Dificultad).

Esaki despues cu Diabierna ultimo, e comision y diferente fundacion y ciudadanonan preocupa pa e casonan di violencia domestico cu ta tumando lugar den nos comunidad, a lanta y bisa: “Basta na abuso y violencia domestico!”

Den entrevista cu sra. Marsman a menciona cu e momento aki ta pa concientiza nos cada un, nos bisiñanan y tur hende rond di nos cu ya ta basta.

El a duna di conoce cu e comision lo bay Parlamento pa haci e peticion pa aumenta e castigo contra maltrato, violencia domestico y tur sorto di abuso. Ademas e dama a subraya cu mester concientiza comunidad pa no acepta ni un abuso mas, y cu mester kibra e silencio, mester denuncia e casonan sea cu e persona mes ta victima of si e conoce un victima.

Sra. Magaly Maduro, Director di Fundacion pa Hende Muher den Dificultad, tambe duna nos informacion, a elabora tocante e banner grandi cu a wordo poni na haltura di e brug na Lagoen, cu e palabranan STOP ABUSO, cu ta un evento organiza pa Comision CASA, na unda dia 30 di Augustus lo tin un podium pa genera fondonan destina pa FHMD.

Na unda e banner ta lo pone un stage. Sra. Maduro a subraya cu esaki no ta un fiesta pasobra tin nada di celebra. Ta un actividad manera tabata tin den pasado den otro paisnan por ehemplo, contra hamber. Awor Aruba lo tine contra abuso.

Lo tin benta di flanel cu tambe lo ta disponible na FHMD tambe. E fondonan ta pa e fundacion sigui traha riba e causa aki.

Sra. Maduro a subraya cu nan ta trahando pa tur organizacion, incluyendo polis, tin tur informacion cu nan mester pa actua, y el a acentua cu no tin excuse mas pasobra nos tur, e comunidad completo, tin algo di haber direct of indirectamente cu violencia domestico y abuso en general.

“Nos ta mire den tur skina di nos isla y si nos no ta stop’e aworaki, aki un par di aña e situacion lo bira un free for all y nos lo biba den un isla masha insigur mes”, e dama a remarca.

Sr. Marinus Wegereef a menciona cu Comision CASA ta haciendo su maximo esfuerzo pa concientiza kico ta pasando na Aruba, pero te aworaki e no a haya e response cu nan kier. E ta sinti cu te ainda den nos pueblo tin e tabu tocante abuso domestico.

Sr. Wegereed ta sinti tambe cu nos comunidad no a siña di e caso di dama cu a muri recientemente door di abuso domestico. E mes a compañe na su ultimo lugar di sociego y a comenta cu e tabata un entiero hopi tristo mes.

E meta di e banner simbolico den e brug ta pa e ex-victimanan, victima of esnan cu conoce victima laga un poesia, of pone un bela, etc., pa mustra cu mester stop cu abuso na Aruba.

El a comenta cu den e encuentro cu Minister Glenbert Croes el a bisa cu e tambe ta sinti su mes cu man mara. Tanten cu e comunidad no bira conciente y reacciona pa stop violencia, por hinca hopi placa den e plan di crisis social, pero e situacion no ta bay mehora.

El a invita henter comunidad pa participa den e podium dia 30 di Augustus. Lo tin dos banda musical pro-deo cu lo tey presente y el a invita tur persona profesional of no cu ta preocupa cu e problema aki pa ta presente.

No ta un actividad unda lo bende alcohol, solamente awa y juice y e t-shirts na benta pa crea e fondo pa e instancia cu mester di e placa cu ta Fundacion Hende Muher den Dificultad, pa nan sigui brinda ayudo. E meta ta pa para abuso domestico pasobra el a sali for di man, sr. Wegereef a subraya.

- Advertisement -

DUNA COMENTARIO

Please enter your comment!
Please enter your name here