Home Hudicial Cuidador di preso acusa di pasa droga na KIA declara liber

Cuidador di preso acusa di pasa droga na KIA declara liber

186
0
SHARE
- Advertisement -

Hues a bisa cu e tin duda si ta set up of no

ORANJESTAD (AAN): Diahuebs mainta abogado mr. Lejuez a convence Hues cu tin hopi cosnan dudoso y no tin nada concreto contra su cliente dama Z.v.d L, acusa di a pasa droga den KIA. Fiscal ta haya cu si tin prueba y a exigi castigo igual na e 56 dianan cu Z.v.d L. tabata sera.

Hues a bisa cu e ta haya cu tin prueba pero no tin prueba convincente. Ademas e ta haya cu e colega di e sospechoso a actua manera hopi straño.

Hues a conclui cu e tin duda y pesey e ta declara Z.v.d L. liber. Ta asina cu na Maart 2018 gerencia di KIA a kita Z.v.d L. Awor cu el a wordo declara liber, e lo haya su trabou bek?

PASA DROGA DEN KIA:

Fiscal a acusa Z.v.d L cu riba 7 di Februari 2017, como cuidador di preso a pasa droga den KIA. E tabatin 154 gram di marihuana den su tas scondi, mas diferente cellular y charger di cellular. Hues a puntra si ta berdad.

Segun Z.v.d L. esey no ta berdad. El a splica Hues cu ora el a bay trabou na KIA, miembronan di CEA a controla su tas y no tabatin nada. Ta despues, ora cu el a bay haci su hefe un fabor y a laga su tas den oficina, a bin resulta cu un colega homber C. a descubri droga den su cas.

 SOSPECHOSO TA PARA RIBA CU TA UN SET-UP:

Z.v.d L. a splica cu el a bay e puesto unda e mester traha y a laga su tas atras riba un stoel y a bay haci un fabor pa su hefe. Na e puesto aki no tin camera di seguridad. Mas o menos 12 minuut el a bay y bolbe su puesto.

Hues a bisa cu un colega a bisa cu Z.v.d L. tabata actua straño. Ta trata aki di e homber C., kende a bisa cu el a bay check den Z.v.d L su tas y a haya un paki di lechi y ora a sacudi esaki y sinti algo duro. El a bisa un otro colega W. kende tambe a mira y W. a bay haci denuncia.

Segun Z.v.d L. esey ta loke nan ta bisa. Hues a bisa cu Polis a papia cu varios cuidador di preso, kendenan ta bisa cu ta ser papia cu Z.v.d L. lo ta pasa cos den KIA y lo ta avisa presonan ora tin accion. E lo ta encarga cu cacho. Z.v.d L. a bisa Hues cu e no ta traha cu cacho. El a bisa Hues cu esey no ta berdad.

Hues a bisa cu den e tas a haya droga, cellularnan y charger. Hues a sigui bisa cu tur esaki lo mester a wordo poni den e tas? Z.v.d L. a bisa Hues cu ora el a bolbe, el a laga e tas caminda el a pone y despues di un rato un superior a bis’e cu e ta wordo sospecha. Z.v.d L. a bisa Hues cu e ta sospecha cu lo tin un set up tabatin contra dje y cu e ta sospecha cu ta e colega C. cu a bay coba den su tas a pone e droga.

Fiscal a remarca cu e colega y un otro lo a bisa cu Z.v.d L. lo a coba den su tas promer cu e colega a bay controla e tas. Abogado mr. Lejuez a puntra e sospechoso si tin rumornan ta circula cu tin funcionarionan lo ta pasa. El a bisa cu tin rumor cu su colega C. cu lo ta trece contrabanda den KIA. El a splica Hues cu nan a hala su atencion cu e mester paga tino kico e ta haci pasobra a mir’e actua sospechoso via camera. E no a gusta. Segun e dama no a traha raport riba esaki.

PASA VIDEO DEN CORTE:

Abogado mr. Lejuez a pidi pa pasa un parti di video camera ora cu ta listra e cuidadornan di preso y tambe Z.v.d L. riba 7 Februari 2017. Por a mira cu tur e personanan tabata pone nan pertenencianan pasa door di machine di scan. Por a mira cu diferente di e cuidadornan di preso, e miembronan di CEA no a listra den nan tas.

Tambe por a mira cu e cuidador C. tabata dilanti di Z.v.d L. y el a coy su tas bay na momento cu e miembro di CEA a coy e bakinan di plastic pa otro cuidadornan di preso pone nan pertenencia aden pa pasa den e scan machine.

Tambe por a mira cu Z.v.d L si a habri su tas pa e miembro di CEA a mira aden y a tik Z.v.d L. na su schouder cu ta bon y pa e sigui bay paden.

CUIDADOR A WORDO KITA:

Hues a puntra Z.v.d L. si e ta suspendi of ta trahando. El a splica cu el a wordo kita pero tin un caso andando. Actualmente e ta trahando un otro caminda.

EXIGENCIA FISCAL:

Fiscal a bisa cu tabatin rumornan contra Z.v.d L. y a haya droga den su tas. E colega C. lo a haya Z.v.d L. ta actua straño y a check su tas ora cu Z.v.d L. no tabata tey. Fiscal a bisa cu e ta convenci cu ta Z.v.d L. a hiba e droga. Segun e sospechoso e otronan lo tin algo contra dje. Fiscal a bisa Hues cu a haya Z.v.d L. cu mas o menos 900 florin y e no por a duna splicacion. A haya papelnan cu cosnan skirbi y tampoco e no por a duna splicacion di esakinan.

Fiscal a remarca cu diferente di e cuidadornan di preso no ta wordo controla y Z.v.d L. a habri su tas pero no tabatin un control debido. Fiscal no ta mira motibo pa C. a pone cos den tas di Z.v.d L. E ta haya Z.v.d L. culpable pa pasa 154 gram di marihuana. Fiscal ta haya cu Z.v.d L. a abusa di e confianza cu tabatin den dje. Pa cu e castigo, Fiscal a tene cuenta cu Z.v.d L. a wordo kita di trabou. E tabatin 56 dia sera y Fiscal ta haya esaki suficiente. El a pidi pa confisca e placa. E cellularnan tambe ta keda confisca pasobra ta mustra cu kier a pasa nan.

DEFENSA ABOGADO:

Mr. Lejuez a bisa Hues cu e ta haya cu mester declara su cliente liber pasobra no tin prueba convicente cu ta Z.v.d L. a hiba e droga den KIA. El a mustra cu for imagennan di video por mira cu C. no a laga controla su tas. Tin mas cuidador di preso cu no a laga controla nan tas. El a cana bay na momento cu miembro CEA a cana bay hiba baki na e machine. Por mira cu miembro di CEA a mira den tas y a tik Z.v.d L. na schouder cu e por sigui.

Abogado a remarca cu C. ta bisa cu door di un parti habri di e tas el a mira un paki di lechi di marca Gloria. E otro colega W. a bisa cu e paki di lechi tabata den un saco di sushi di plastic transparent. E miembro di CEA, cu a mira den e tas, ningun momento ta menciona di un paki di lechi sino un shaker di traha shake.

RUMORNAN FALSO:

E abogado tambe a mustra cu un otro funcionario T. di KIA ta menciona cu dos otro cuidador di preso lo a bisa cu Z.v.d L lo ta pasa droga y cellular. Un ex preso lo a bisa esey. E abogado a señala cu ningun di esakinan no a wordo scucha pa Polis. Solamente e funcionario T. kende a tende di otro cu a tende di otro.

Un otro colega W. ta bisa cu Z.v.d L y tampoco e mes a wordo controla, siendo cu e miembro di CEA y tambe riba camera por mira cu Z.v.d L a wordo controla.

E abogado tambe ta señala cu W. a bisa cu C. lo a bay coba den tas di Z.v.d L. Na opinion di e abogado mr. Lejuez, mescos tambe C. por a hinca cos den tas di Z.v.d L. Pakico C. no a yama W. promer cu el a bay controla e tas? Ta despues, el a bay yama W. pa controla. E abogado a señala cu C. a declara na Landsrecherche cu W. lo a bisa cu ta C. ta pasa cos den KIA pero awor ta resulta cu ta Z.v.d L.

E abogado a remarca cu aki ta bay tras di rumornan falso pero no tin nada concreto. E abogado ta haya cu C. tabatin suficiente tempo pa a hinca cos den tas di Z.v.d L. ora cu Z.v.d L a bay haci fabor pa un superior. Pa loke ta e placa cu Z.v.d L. tabatin cun’e, e abogado a bisa Hues cu tin prueba cu Z.v.d L a saca placanan entre Januari y Februari y no ta sospechoso cu e tabatin 900 florin cun’e. E abogado ta haya cu C. a haci esaki pa kita sospecho riba su mes. El a pidi Hues pa declara Z.v.d L. liber.

SOSPECHOSO DECLARA LIBER:

Hues a pospone e caso un rato pa tuma un decision. Ora Hues a bolbe el a bisa cu pa duna sentencia mester tin prueba pero tambe prueba convicente. Hues ta haya cu no tin prueba convicente. El a menciona e colega C. ta actua sospechoso. Pakico C. lo a bay coba den tas di Z.v.d L. promer y despues a yama W. pa check. Hues ta haya cu den e caso aki tin demasiado rumornan sin base.

Tambe Hues a señala cu C. no a wordo controla. Tambe Hues a mustra cu ta C. su so tabata den e espacio cu tas di Z.v.d L. Hues a conclui cu e tin duda y pesey ta declara Z.v.d L liber.

Tempo lo mustra si Fiscal lo apela e decision di Hues of no. Awor cu Z.v.d L. a wordo declara liber, kico ta bay pasa cu su trabao y e caso contra e retiro cu ta andando? Den pasado tabatin un caso di maltrato severo den KIA caminda diferente cuidador di preso a wordo kita promer cu e caso penal y despues nan mester a reanuda trabou. Ta mucho tempran pa bay specula y ta mihor warda mira kico lo bay sosode.

 

- Advertisement -

DUNA COMENTARIO

Please enter your comment!
Please enter your name here