Home Policial Dama herida tres siman pasa den accident na Noord a fayece

Dama herida tres siman pasa den accident na Noord a fayece

1166
0
SHARE
- Advertisement -

ORANJESTAD(AAN):  Tabata Diabierna dia 3 di Augustus, alrededor di 8:30 am cu un accident a keda registra riba e caminda di Noord pa Sabana Liber, net un tiki pariba di Cruzada di Luz di Trafico Noord.

Polis a deduci cu e chauffeur di un Toyota Tercel color blauw cu number A-1520 tabata usando su Smartphone y tabata type y lesa message, ora el a pasa y dal un peaton femenino.

E impacto tabata fuerte, pasobra e peaton a bay dal den e windshield.  E dama herida a resulta di ta Emiliana de Leon, di 76 aña di edad. E impacto a pone cu hasta su zapato a kita di su pia y a zwaai riba caminda.  E impacto a pone kibra su braza banda drechi, y a causa multiple fractura na su pianan.

E victima tabata na pia canando rumbo pa un adres na Alto Vista, unda e ta traha.

Polis como tambe Ambulans a yega rapidamente na e lugar, y cu urgencia a hiba e dama pa Hospital.  Di e tempo ey el a wordo interna den Unidad di Cuido Intensivo, unda poco-poco a mire mehora.

Siman pasa nan a ripara cu su condicion a mehora bastante, y el a wordo saca di ICU y pasa pa afdeling di Medium-Care.  Sinembargo Diasabra un biaha mas el a haya complicacion, y a dicidi pa pone bek den ICU pa observacion.

Sinembargo e biaha aki e no a recupera di e complicacion, y riba Diadomingo el a fayece.  Su yiu muher cu tabatin 15 aña sin mire pero tog ta chat cune regularmente, a viaha pa Aruba y tabata presente ora cu el a hala su ultimo rosea.

E victima Emiliana de Leon ta mihor conoci como “Ana”, y desde 1993 el a bandona su Republica Dominicana natal, y a bin Aruba pa busca un mihor porvenir.  Den su 25 aña di residencia na Aruba, el a cera hopi amistad.  Hopi hende tabatin hopi cariño y aprecio pa Ana, debi cu e ta hopi tierno y tin un imagen di ‘mama’ pa hopi hende.

Cu su trabao na Aruba, e tabata sostene su famia na Republica Dominicana.  Famia a dicidi cu nan kier transporta su restonan mortal pa Santo Domingo, pa aya nan dune su entiero.

Famia a mustra cu ainda nan no a haya e rapport di Polis encuanto e accident di tres siman pasa.  Ni e chauffeur responsable cu tabata manda message, no a bay bishita na Hospital e victima cu el a herida malamente.

E yiu muher di Ana tin un deseo grandi, pa tur chauffeur percura pa nan no neglisha atencion pa trafico y ta sinta chat of manda message riba Whatsapp.  E ta pidi chauffeurnan pa para un banda di caminda pa asina haci esey.  Pasobra aki por mira con bida di un hende asina hopi keri, a bay perdi djis debi na smartphone.

Na famia di Emiliana de Leon, DIARIO ta manda palabranan di condolencia.

 

- Advertisement -

DUNA COMENTARIO

Please enter your comment!
Please enter your name here