Home arte y espectaculo Di dos edicion di ‘Honor to Connor Steelband Celebration’

Di dos edicion di ‘Honor to Connor Steelband Celebration’

38
0
SHARE
- Advertisement -

ORANJESTAD   (AAN):  Diasabra anochi Sweet Pan Music Productions a presenta e segundo edicion di ‘Honor to Connor Steelband Celebration’ riba escenario di Amphitheatre Edgar Connor na Paseo Herencia Mall.

Un anochi di homenage na e Legendario Sr. Edgar Connor (q.e.p.d.) cu ta Pionero den musica Steelpan, Maestro den traha Steelpan, Tuner, Docente y Fundador di e famoso ‘Aruba Invaders Steel Orchestra’.

Edgar Connor a nace na Aruba 18 di Januari 1939, for di un edad sumamente hoben ela dedica su mes cu hopi pasion na e musica di Steelpan. Su inspiracion a bin for e trahadornan decendiente di Trinidad cu tabata labora na nos Refineria Lago den añanan 50.

Yiunan Nico y Lee a sigi paso di nan mayornan Edgar y Gloria Connor-Thomas manteniendo e herencia musical di Steelpan bibo, educando nos muchanan, dunando workshops na scolnan basico, hasiendo presentacionan ful rond di Aruba na eventonan local y turistico, y continuamente trahando riba diferente projecto y produccionan. Quincy y Wesley, yiunan di Lee, tambe a lanta ta dedica nan mes na e musica di Steelpan.

Ruben Garcia a fungi como Maestro di Ceremonia y ariba e anochi aki el a wordo acompaña pa Paula Engelen PR Event Planner-Coordinator di Sweet Pan Music Productions y tambe pa Abigail Croes Marketing y Events Coordinator di Paseo Herencia.

Rumanan Nico y Lee a habri e anochi musical cu a cuminsa cu un presentacion acustico cu e sonido puro di Steelpan cu a comove e publico presente. Nan a sigi pa e parti moderno combina cu backing tracks pa demostra e parti moderno di performance di awendia, di cual Nico ta e Trend-Setter. North Stars Steelband a duna un tremendo presentacion completamente acustico, Marver Guedez di apenas 15 aña a sa di sorprende e publico cu su talento ariba Steelpan y a wordo acompaña pa Eltienne Yarzagaray riba keyboard y Eugene Jones yui di Edgar Connor riba drums.

Algo cu tabata sumamente agradabel tabata e gospel ‘Bo ta Santo’ cu a wordo presenta den e version Reggae. Y pa ora cu Quincy y Wesley Connor a subi escenario cu nan good looks y conoci pa destaca den e deporte di Wind & Kite Surfing, e publico a keda encanta pa mira nan talento ariba Steelpan tambe cu nan ta toca ya for di e edad di tres aña.

Na final The Invaders cu ta consisti di Nico y Lee Connor, Eugene Jones, Quincy y Wesley Connor, Angel Hazel, y acompaña pa e gran musico Ivan Quandus ariba baho, a sa di lanta e publico cu e tremendo Jam Invaders Calypso cu ta un composicion di Sr. Edgar Connor y durante e presentacion di The Invaders N.L.G. Dancers a duna un bunita presentacion ariba e dushi musica di Steelpan. Y asina tambe a invita tur e artistnan cu a presenta pa subi escenario pa hunto nan laga e multitud di Steelpans resona y tembla Amphitheatre Edgar Connor pa un tremendo clausura di e anochi.

Durante e anochi a duna reconocimento na dos persona cu a contribui na e mundo di Steelpan aki na Aruba, Sr. Freddie Tromp fundador y integrante di North Stars Steelband cu ta toca Steelpan desde 1964 aportando na e herencia cultural di Steelpan y tambe na e Maestro di Ceremonia Ruben Garcia cu semper a duna sosten den e mundo di farandula na Famia Connor, cuminsando na Edgar Y Gloria Connor-Thomas sigi pa e rumanan Nico y Lee Connor.

Famia Connor ta sumamente agradecido na tur esnan cu a bin presencia e celebracion aki y a keda contento di wak miembronan di prensa, coleganan musico, personalidadnan grandi den cultura, turistanan y e publico en general ta disfruta di e ‘Honor to Connor Steelband Celebration’.

 

 

 

 

- Advertisement -

DUNA COMENTARIO

Please enter your comment!
Please enter your name here