ORANJESTAD (AAN): Un informacion cu a bin di Municipio Ribas di Estado Aragua na Venezuela, tabata espantoso e siman aki.
Dos homber, identifica como Victor Moisés Mesone di 47 aña y Jorge Alpidio Báez di 48 aña, a wordo deteni door di Polis. Autoridad a gara nan net ora cu e dos hombernan aki tabata transporta un cargamento di cacho cu supuestamente nan a horta di e doñonan.
Segun e informacion oficial, e dos hombernan aki tabata dedica nan mes pa horta e cachonan aki di tur raza, y despues tabata mata nan, pa bende nan carni comosifuera nan ta carni di baca, na diferente negoshi cu ta traha Arepa pa bende cu publico, como “Carne Mechada”.
E detencion di e personanan anti-social aki, a wordo logra danki na diferente denuncia y follow-up haci door di Ambientalistanan cu ta pertenece na Mision Nevado, kendenan a sigui trece prueba y demas informacion na Polis.
E denunciantenan a informa cu te cu ora cu nan a detene e dos hombernan aki, nan ta calcula cu como 47 cacho a wordo horta. Nan a añadi cu e dos hombernan aki, posiblemente cu algun compinchi mas, tabata transporta pa dia entre 4 pa 7 cacho pa despues bende nan carni na diferente negoshi di Arepa di e ciudad, y sectornan eybanda, specialmente rond di Sector Sarayauta.
Polis a interoga e dos hombernan, y awor a bay den man di Fiscal di Ministerio Publico pa asina hudicialmente por sigui cu e investigacion, pa determina cuanto hende mas ta complice cu esaki.
Pueblo Venezolano a lanta furioso, sabiendo cu kizas nan lo a come Arepa ultimo simannan cu ta contene carni di cacho.
