Home Policial El a bati e muher malamente y pesey Pueblo ta furioso cu...

El a bati e muher malamente y pesey Pueblo ta furioso cu a laga e Polis den libertad

928
0
SHARE
—Asina hopi golpi el a propina e muher.
- Advertisement -

ORANJESTAD (AAN): Tanto bal bo bin cu campaña di “Stop Abuso y Maltrato” na Aruba.  Pasobra Diahuebs mainta pueblo a bolbe lanta cu un sabor amargo den boca.

Esey a socede ora cu a bin haya sa cu Ministerio Publico a dicidi na laga e agente policial Owar Ardila den libertad por lo pronto.

El a keda deteni Diaranzon 15 di Augustus, esta apenas siman pasa, ora cu a bin descubri cu un supuesto amiga/novia di dje a wordo maltrata severamente.  E potretnan cu a wordo saca, ta como 3 dia despues di e maltrato.

Pueblo a reacciona furioso riba Social Media encuanto su liberacion.

Algun rato despues, Cuerpo Policial Aruba via nan vocero, a core emiti un boletin pa 11:55 am pa mustra cu e agente policial cu tabata deteni pa maltrato, a ricibi di Dialuna 20 Augustus 2018 caba un prohibicion.  E prohibicion ta cu e no mag di drenta ningun tereno, edificio, ningun vehiculo, ni nada cu tin di haber cu instalacion di Cuerpo Policial Aruba.

Esaki ta en conexion cu e investigacion andando.

Manera DIARIO a raporta caba, e caso severo a socede na Sero Pita 47-B, unda un conflicto severo a socede cu e pareha hoben bibando pa como 2 aña caba na e Apartamento na e adres aki.  Pa un motibo of otro, e agente policial cu e fam Ardila, a duna su compañera di bida un sota cu a bay acompaña cu golpinan fuerte y duro na parti ariba di su curpa, specialmente na su cabez.  Ora pueblo a mira e potretnan, a realiza ta con pisa esaki tabata.

Despues di a duna e dama maltrato severo, lagando su wowonan tur hincha, manchanan blauw tur caminda, cu yen di bolombonchi den cabez, lip hincha, y un corta chikito riba klep di wowo banda robez, e agente Owar a dicidi na cera e dama den camber y no lage sali ni pa bay Hospital.  El a pone e porta na lock cu candal.

E dama a keda henter Diadomingo anochi den dolor inmenso, y mesun cos riba Dialuna.  Henter dia el a keda na cas, y no tabatin forma ni pa bati alarma y pidi auxilio.  Diamars a habri y keto bay su curpa ta tur stijf, cu yen dolor di cabez, y ainda wowonan tabata dolor y casi no por habri.

Pero bon mes riba Diamars el a logra di comunica cu un friend, kende porfin a bay na e cas, a logra sake di e cas.  E dama cu tur curpa stijf, a haye obliga na bula un pida muraya pa asina por a huy y asina yega den mannan safe di su amigonan, y asina Polis a bin haya sa di e caso.

Den menos di un siman pues, e ta den libertad pendiente mas investigacion.  Fuentenan a bisa cu Ministerio Publico no tabatin base mas pa tene den detencion.  Pero e agente Owar ta sigui como sospechoso y lo wordo persigui, hasta si e victima retira su denuncia of no.  Esey ta debi cu algun medio di comunicacion a raporta cu e dama a dicidi na kita e denuncia, pasobra e kier drecha e relacion cu e agente Policial.  Pero Ministerio Publico no por a confirma esey Diahuebs atardi.

- Advertisement -

DUNA COMENTARIO

Please enter your comment!
Please enter your name here