Home Gobierno Gastonan di personal a subi cu 600 mil florin y minister Ruiz-Maduro...

Gastonan di personal a subi cu 600 mil florin y minister Ruiz-Maduro ta splica e motibo

21
0
SHARE
- Advertisement -

CAft ta observa den su carta pa gobierno:

ORANJESTAD (AAN) – Minister di Economia y Finanzas sra. mr. Xiomara Ruiz-Maduro, den conferencia di prensa di gobierno, Dialuna, a elabora tocante e carta di CAft, cu segun e mandatario ta un indicacion cu e confianza riba Aruba su finanzanan publico, ta biniendo bek.

GASTONAN DI PERSONAL:

Siguiendo cu e tema di gastonan di personal y kico CAft su opinion ta, e dignatario a menciona cu esaki ta mustra 600 mil florin mas halto cu e proyeccion den e mitad di aña, pero esaki tin su splicacion.

E mandatario a splica cu ora e gobierno aki a sinta nan a haya nan mes cu un cantidad di contrato cu sea a wordo firma of a pidi prolongacion, door di e gobierno anterior.

Tin cosnan cu ainda no a keda resolvi. Gobierno a haci un parti di e tarea na December, pero no ta tur cos ta cla y lo keda cune durante e aña y incluso tin casonan den Corte y cu tanten ta den Corte gobierno tin cu keda paga e empleado.

Banda di esaki tin gastonan di esnan cu a traha como Consehero. Minister Ruiz-Maduro a menciona cu riba su presupuesto mes tabata tin cuater di cual un so el a logra kibra e contrato, y cu tambe ta costa placa. Tin otro cu mester sigui te fin di September, y ta un suma barbaro cu tin cu paga den Euro, pa un asistencia cu gobierno no ta haciendo uso di dje tampoco.

Tur esaki, e mandatario a acentua, ta keda proyecta den e subida ey di gastonan di personal.

CUENTA DI CAPITAL:

Tocante e tema aki e mandatario a duna di conoce cu e cuenta di capital ta positivo: 4.4 miyon florin. El a remarca cu den e di dos periodo di aña hopi inversion mester tuma lugar ainda.

Akinan CAft ta specifica, encuanto entradanan di gobierno, cu e grondbelasting, winstbelastig y loonbelasting ta kedando atras. E dignatario a indica cu esaki ta opinion di CAft.

El a splica cu loonbelasting y dividendbelasting ta mas halto cu e proyeccion, pues e belasting aki ta cana dilanti di loke a wordo proyecta.

Tambe e belasting indirecto ta 10.6 miyon mas halto cu a wordo proyecta pa mitad aña. Kiermen, aki tambe ta cana dilanti y esaki tin di haber cu e parti di Douane.

DIVIDENDO:

Tocante e tema aki Minister Ruiz-Maduro a splica cu e carta di CAft ta menciona cu e realizacion di dividendo ta mustra mas halto cu e proyeccion y ta spera un ganashi inespera “meevaller” pa fin di aña. Kiermen cu gobierno ta bay haya mas na dividendo di loke a premira na prome instancia.

CAft ta aconseha pa bin cu un maneho con pa trata cu dividendo, pasobra Aruba no tabata tin un maneho pa esaki. Pesey awor CAft ta pidi pa esaki tambe por wordo hinca den un maneho structura adelanta pa tur hende sa cu cuanto placa di dividendo por conta y cu cuanto no.

DEN TERMINO GENERAL:

Minister Xiomara Ruiz-Maduro a expresa cu en general esaki ta e contenido di e carta di CAft, nan opinion riba e cifranan di e di dos cuartal. E ta un bon carta y ta mustra cu e trabaonan ta wordo haci pa por drecha e situacion financiero di nos pais, y cu tambe gobierno ta den e cuadro financiero di locual Parlamento a duna, a fiha, y tambe aproba.

“Pues nos ta den bon caminda pa loke ta recuperacion di e credibilidad financiero di Pais Aruba”.

 

- Advertisement -

DUNA COMENTARIO

Please enter your comment!
Please enter your name here