Home Estilo Hopi di nos grandinan ta sinti nan mes nan so

Hopi di nos grandinan ta sinti nan mes nan so

417
0
SHARE
- Advertisement -

Sinti bo mes bo so, ta un di e problemanan grandi di personanan di mayor edad. Hopi biaha e perdida di un familiar of yiunan cu no bishita ta conduci na esey.  Soledad ta malo pa tur cos, pa nos intelecto, pasobra nos a perde contacto cu otronan, di relaciona nos mes.

Ta malo pa nutricion, un persona cu ta solo of cu ta biba su so no ta haci mucho esfuerzo pa alimenta cu un dieet varia of no ta preocupa pa e tipo di cosnan aki. Ademas, te ora su animo ta cay, den personanan deprimi ta mas facil cu nan sistema inmuun ta sufri.

Pa hopi persona mayor di edad, soledad no ta algo di un decision propio, sino di situacionnan cu ta presenta durante bida. Aki na Aruba hopi personanan mayor di edad ta enfrenta e realidad aki cu ta un factor di riesgo pa salud, tanto fisico como mental. Soledad ta un situacion cu por induci na multiple sintomanan den personanan mayor, manera depresion, bay atras, demencia, enfermedadnan di curazon, desnutricion etc.

Un cos ta biba bo so y otro ta diferente na sinti bo, bo so. Y esaki ta loque ta pasa cu hopi di nos grandinan. E ta un problema na unda cu hopi biaha e propio famia mes ta drenta den accion pa busca un posibel solucion. Den propio famia mester incentiva pa e grandi mantene su actividad social, disfruta di bida, e ta sinti su mes util y na mesun tempo mantene su independencia, semper cu nan ta capacita pa esey. Si nan no ta mester percura pa nan no sinti nan mes nan so.

Den e mundo di awendia caminda tur hende tin nan mesun preocupacion y responsabilidadnan, ta lubida tin biaha cu quizas tin un grandi na cas su so, wardando pa riba un familiar pa e por combersa cu ne. E manera  y e situacion cu antes bo ta haya cu ta cu mayornan, of welonan ta e centro di atencion y tur dia mester ta hunto cu nan, no tey mas.

Antes henter famia ta tur ora hunto, ta keiro hunto, ta fiesta hunto, pero awendia esey no ta e caso mas. Y hopi  hende grandi ta sufri esey den silencio ora nan keda nan so, despues di perdida di nan pareha. Nan ta pensa cu ya no tin necesidad di biba mas, pasobra ningun hende ta worry cu ne.

E pensamentonan ey cu poco poco ta birando mas negativo, ta pone nan cay den un depresion di soledad pisa y ta bira malo sin nan sa kico nan tin. Hopi ta pensa, “mira cuanto trabao mi a pasa cu mi yiunan y nietonan, y awor ningun no por pasa un rato pa bishitami”.

Tin tambe personanan cu nan capacidad fisico por ta limita y nan mester di un atencion special pa evita cu nan ta sinti nan mes nan sol, y ademas pa nan mantene un actividad fisico y mental basico. Tin na Aruba varios thuiszorg cu por hiba e grandinan, pero hopi tambe ta e grandinan cu no kier bay den un lugar di anciano.

Tin hopi cosnan cu por haci pa e grandinan, pero na final ta responsabilidad di famia pa nan ser queri no sinti e soledad y dune e berdadero balor. Ta conveniente cu nan tin e mayor bida social posibel, cu nan ta acudi na centronan den dia, cu nan tin bishita di amigonan y famianan, cu si nan por pa nan sali bay haci compra, cumpra catochi, of cumpra pan, bay docter, si nan gusta bay un lugar, laga nan bay, pa e sintie feliz, y sinti cu e ta wordo balora.

 

- Advertisement -

DUNA COMENTARIO

Please enter your comment!
Please enter your name here