Home General Lo kita prohibicion na profesionalnan cu ta detecta abuso pa bati alarma

Lo kita prohibicion na profesionalnan cu ta detecta abuso pa bati alarma

68
0
SHARE
- Advertisement -

Minister Presidente a indica:

ORANJESTAD (AAN) – Un hecho hopi importante cu Minister Presidente a menciona riba podium, durante e evento Stop Abuso Domestico, ta cu e profesionalnan cu ta traha pa gobierno cu ta detecta abuso, casi pa ley ta prohibi pa nan bati alarma.

Tin un norma di trabao cu nan no por kibra, pero e mandatario ta haya cu esey mester cambia. E ta di opinion cu ora un profesional den ehercicio di su trabao ta mira cu tin abuso, e ta bay wordo obliga pa bati alarma.

Tin diferente desafio legal y financiero cu mester bay atende cu nan, pero e dignatario a garantiza cu gobierno ta trahando riba esaki pa, ohala, yega na un plan concreto y percura pa e fondonan pa cuminza ehecute.

E dignatario a referi tambe na e Plan di Crisis Social cu a bin riba mesa despues di un incidente hororoso: e morto di dos angelito.

Minister Presidente a subraya cu nos tin un minister di Asunto Social cu ta hopi apasiona pa su trabao y el a logra. E plan di crisis social tey pero tin biaha cu traha cu burocracia tin su retonan.

E plan di crisis social ta temporal. E ta pa dos aña so, y gobierno enberdad ta kibrando cabes for di awor caba tocante kico ta bay pasa despues di e dos añanan aki.

“Kico ta e alternativa? Hinca e placa den otro cos? No! Pues alomenos algo ta wordo haci pa atende cu e tema y busca un solucion pa aki dos aña, kico nos ta bay haci.

“ Como gobernante, un biaha mas cu mi coleganan mi ta gradici e organizadornan, felicita boso, desea boso hopi sabiduria, exito y determinacion y na tur hende cu ta traha den e area aki” e dignatario a subraya.

El a papia tambe como ciudadano, yiu, ruman, tanta, casa, mama, prima, amiga y wela, el a haci un yamada na esnan cu ta scucha y otronan cu tambe ta ruman, mama, prima, wela, colega, etc., cu no kier mañan habri corant y weita cu algo a pasa cu nan yiu, nan prima, nan ruman, nan amiga…y cu e por tabata sa pero no a haci nada.

“Si bo sa cu algo ta pasando, si bo ta teme cu algo ta pasando anto bo tin cu haci algo. E no ta facil, e ta duro, pero si keda sin hacie e prijs ta mucho caro pa paga. Si berdad bo ta stima e bisiña, e amiga e sobrina ey anto bo ta haci algo. Y respecto ki bo ta haci cu bo propio relacion cu e persona, pasobra cada un di nos tin cu carga responsabilidad. Nos mester kibra e tabu nos mes, pasobra nos tur ta cana cune. Si nos cuminza kibra e tabu, papia cu e hende, yude busca ayudo, nos cada un ta dunando un paso den e direccion corecto y ayudo tin”, Minister Presidente a expresa.

E dignatario a referi na dos persona cu el a reconoce den e publico, cu ta traha cu alma y cuerpo di dia pa anochi, y cu no tin momento cu nan no ta atende un grito di ayudo.

El a bolbe haci un yamada pa saca un man si nos sa cu tin hende cu mester di ayudo. No keda keto. “Hunto nos mester bisa no mas Violencia Domestico”…Minister Presidente a expresa pa conclui.

 

 

 

 

- Advertisement -

DUNA COMENTARIO

Please enter your comment!
Please enter your name here