Home Hudicial Ministerio Publico ta apela contra sentencia cu a declara  sospechoso di traficacion...

Ministerio Publico ta apela contra sentencia cu a declara  sospechoso di traficacion di droga  liber

161
0
SHARE
- Advertisement -

ORANJESTAD (AAN) — Dia 20 di Juli 2018, Hues di Corte den Promer Instancia a declara liber e homber Venezolano bibando na Aruba, R.S. di e acusacion di traficacion di 357 kilo di cocaine den dos container yena cu hero bieu. Esaki ta un sla duro pa Fiscal cu ta haya R.S. culpable y a exigi 12 aña di prison. DIARIO a puntra e vocero di Ministerio Publico si Ministerio Publico ta bay apela. Mester a warda pa Ministerio Publico caba di studia e sentencia y a haya e contesta cu Ministerio Publico ta apela.

EXIGENCIA DI FISCAL

Luna pasa tratamento di e caso a tuma lugar caminda for di e procesverbaal di Polis por a compronde cu tabata investigando un tip cu a haya cu lo ta trafica cantidad di droga den container di hero bieu.

Fiscal a laga confisca e containernan cu a wordo transporta for di un tereno na Piedra Plat pa Barcadera. For di Barcadera a hiba e containernan cuartel militar na Savaneta, caminda a habri esakinan y a bin haya 357 kilo di cocaina scondi. Fiscal a bisa cu e 30 portanan patras di pick up tabatin blokinan di cocaina cubri cu lood.

Fiscal a sigui bisa cu e miembronan di Douane a bisa cu nan no a mira nada di esey ora cu nan tabata controla e cargamento di e containernan caminda hasta a uso cachonan anti droga. Segun Fiscal, por bien ta cu e cachonan anti droga no a hole e droga. A haya recibo na cas di R.S. Esun responsabel di e container ta responsabel di e droga. E pregunta ta si ta R.S. of K. Fiscal a cuestiona e forma luhoso cu R.S. ta biba na Aruba y cu e bendemento di hero bieu lo no yega pa paga tur esaki. Fiscal a exigi 12 aña di prison. El a pidi pa confisca e placanan, holoshi Rolex y documentonan cu a haya na cas.

SENTENCIA

Hues a bisa cu dia 6 December 2017, tres Douanero a controla 2 container. Promer 2 cacho a controla e containernan pa droga y no a haya nada. Durante cu tabata carga e container e miembronan di Douane tabata controla tambe. Despues a seya e containernan. Ademas a pone candal. E containernan a keda riba tereno na Piedra Plat y 8 December 2017 a hiba nan Barcadera pa transporta.

Fiscal a laga confisca esakinan y hiba nan Savanete Kamp caminda a bin haya 357 kilo cocaine scondi den 30 porta di baki di pick up. Douaneronan a bisa cu e portanan aki no a wordo hinca durante controla. Conclui cu despues di seya containernan a habri esakinan atrobe y hinca esakinan. Douaneronan a reconoce R.S. cu tabata esun encarga pa yena e carganan den e containernan.

FAYO DEN INVESTIGACION

Hues a bisa cu e pregunta ta si ta R.S. tabata esun cu a hinca e portanan di baki di pick up y si e tabata sa cu tabatin droga den nan. Hues a mustra cu durante tratamento di e caso, R.S. a admiti cu riba orden di K. a yena e containernan y e no tabata sa di portanan di pick up.

Hues ta haya cu for di e investigacion haci, no ta cla si e portnan a wordo hinca dia 6 December 2018 of despues.

Tambe Hues a mustra cu no por saca afor si a kibra seyonan. No tin investigacion haci riba esaki. Hues a mustra cu e homber K. a bisa cu e heronan bieu ta di R.S. y e containernan ta di R.S. Na opinion di Hues esaki ta un declaracion su so, contra esun di R.S. Tin un persona ta bisa cu R.S. ta traha eynan y ta encarga cu heronan bieu.

Hues a señala cu e doño di e tereno no a wordo scucha pa saca afor si di berdad R.S. a huur e tereno y cu e heronan ta di R.S.

Hues a sigui señala cu for di tapnan no por conclui cu R.S. lo tabata papia di droga.

E recibonan cu a haya di R.S. el a splica cu ta pa K. el a bay haci’e. Hues ta haya cu esaki por ta posibel.

Hues a mustra cu Fiscal a señala cu R.S. ta biba den luho y lo mester tin entradanan ilegal. Hues ta haya cu investigacion a mustra cu R.S. ta dispone di suficiente entrada. 

DECLARA LIBER

Hues a conclui cu for di e investigacionnan haci, no por proba cu ta R.S. ta culpable y pesey e ta declara R.S. liber. Por a ripara cu R.S. a haci suspiro di satisfaccion.

Den e sentencia Hues ta mustra bon cla cu Fiscal a faya den haci mas investigacion pa saca afor si realmente ta R.S. ta culpable. 

TA APELA SENTENCIA

DIARIO a haya confirmacion for di vocero di Ministerio Publico cu ta apela e sentencia aki. Esey ta nifica cu posiblemente e aña aki ainda e tratamento lo por tuma lugar den Corte Superior. 

SOSPECHOSO A BAY

Investigacion cu DIARIO a haci ta mustra cu e sospechoso R.S., despues di a haya su libertad, a dicidi di bay bek Venezuela. Den un combersacion cu abogado mr. Lejuez, el a duna di conoce cu su cliente a dicidi di bay bek Venezuela pasobra e no ta tuma risico cu si Fiscal apela e sentencia of por cuminsa un otro investigacion y ta bolbe detene.

Esey ta nifica cu tratamento di e caso lo bay ta sin e sospechoso. Aki lo ta mas bien cu Ministerio Publico no kier guli e pilder marga cu a faya den investigacion manera Hues a bisa y ta bay busca decision di Corte Superior

 

- Advertisement -

DUNA COMENTARIO

Please enter your comment!
Please enter your name here