Home Labor SEPPA lo bolbe acerca Minister di Labor tocante su insinuacionnan tocante DPL

SEPPA lo bolbe acerca Minister di Labor tocante su insinuacionnan tocante DPL

42
0
SHARE
- Advertisement -

ORANJESTAD (AAN) – Den entrevista cu sra. Magaly Brito, Secretario General di SEPPA, el a duna di conoce cu e sindicato ta bay atende cu Minister Glenbert Croes, tocante e asunto di Departamento di Progreso Laboral (DPL).

E trahadornan a acerca SEPPA cu e problema aki, mirando cu despues di e conferencia di prensa cu e minister a duna, entre otro el a bisa cu e ta kita e autoridad di e management team, cual por cierto e mes a instala, pasobra e ta bisa cu tin cosnan robes ta sosodiendo den e departamento aki.

Sra. Brito a menciona cu e dignatario no a bisa kico ta e cosnan robes aki; e ta lague habri y esey ta e parti fastioso pa e trahadornan, pasobra nan tur ta puntra na ken e minister ta referi, exactamente y kico segun e minister ta bayendo robes y si e management team tabata na haltura si, of no.

En todo caso, SEPPA a dirigi e minister un carta y basa riba esaki nan tabata tin un combersacion y e sindicato a bise cu si e ta sinti cu tin cosnan robes cu ta tumando lugar den e departamento, pa e gara e toro na e cacho.

Kiermen, entrega e keho, cana su caminda y si ta cosnan, erornan, cu ta sosode incidentalmente, e por cana su proceso disciplinario y tuma su medidanan.

“Pero cana sinta insinua cosnan riba e trahadornan, ni crea spiritonan y si e ta sinti cu tin spirito mes, e tin cu tuma paso pa elimina esakinan. Pa motibo cu SEPPA ta para, sigur, pa servicionan publico di calidad, na unda cu nos ta pidi e empleadonan, sirbidornan publico, pa brinda un servicio optimal di acuerdo cu nan consenshi, na un manera corecto, pasobra na final nan debe e comunidad e servicio aki. Nan tin un responsabilidad cu nos comunidad, cu na final ta esun cu ta paga nan salarionan”, sra. Brito a señala.

E dama a menciona cu SEPPA lo reuni un biaha mas cu e minister pa bolbe trata e tema aki, lo bolbe pidie pa coregi e situacion cu ta reinando na DPL, segun’e y si nada sali afo e tin cu indica tambe cu no tin nada andando na DPL.

Tocante e hecho cu e minister a kita autoridad di e management team e mandatario tin cu clarifica cierto situacionnan cu segun’e a pasa cu no tabata corecto, y di otro banda e trahadornan ta intrankilo ya cu ningun hende sa na kico e ta referi ni kico ta su insinuacionnan.

“En todo caso, un departamento asina importante manera DPL no ta amerita e situacion cu ta reinando na e momentonan aki. E no ta bon pa e trahadornan, e servicio ni e comunidad cu ta den duda y ta wak paden di e departamento kico e hendenan ta haciendo y si locual nan ta haciendo ta corecto of no”, sra. Brito a indica.

E dama a expresa tambe cu siguiendo e declaracionnan di e minister por ripara cu e ta refiriendo na hendenan di e departamento aki cu anteriormente a haya nan mes acusa di actonan fraudulento, y cu lo a keda traha eyden of tin cierto click of kizas e ta sinti cu nan lo tin relacion cu e minister anterior cu ta den e caso andando, pero kico cu por ta pasando e minister tin cu atende na un manera corecto, segun e Secretario General di SEPPA.

- Advertisement -

DUNA COMENTARIO

Please enter your comment!
Please enter your name here