Home Parlamento Shailiny Tromp di MEP preocupa cu ta sigui aumenta cambernan di Hotel

Shailiny Tromp di MEP preocupa cu ta sigui aumenta cambernan di Hotel

108
0
SHARE
- Advertisement -

ORANJESTAD (AAN): Parlamentario Tromp-Lee di MEP ta contento cu prome cu augustus termina Gobierno lo ta den Parlamento, cumpliendo cu un mocion cu Fraccion di MEP a presenta, caminda a urgi Gobierno pa den augustus nan bin duna relato di e prome 6 lunanan di 2018.

No solamente Gobierno mester presenta e cifranan pa loke ta trata gasto y entradanan real pero tambe mester indica con nan ta bay reduci gasto na un manera structural. Na mes momento e lo ta un momento ideal pa Gobierno elabora ariba implementacion y formacion di maneho y mas cu tur cos informa Parlamento con Gobierno ta atendiendo cu e diferente retonan cu nos pais tin actualmente.

Un di e puntonan cu sigur Parlamentario Tromp-Lee lo kier trata ta e cantidad di cambernan adicional cu Gobierno ta premira cu lo bini den e aña(nan) nos dilanti. Ya caba por a tuma nota di e inicio di ampliacion di cantidad di cambernan door di hotelnan.

Ta di suma importancia pa Gobierno calcula kico ta e impacto di cualkier crecemento mirando cu ta generalmente conoci cu e crecemento aki ta bay man den man cu importacion di forsa laboral for di den region. Esaki sigur lo tin su consecuencia riba e infrastructura di nos pais den su totalidad ariba corto y largo plazo. No solamente ariba e parti di vivienda, caretera (ya congestiona), cuido medico (listanan di espera hopi largo), pero tambe ariba nos scolnan (klasnan grandi, falta di localidad), fondo di AZV y mas cu claro nos naturalesa.

Den acuerdo di gobernacion “Hunto pa Aruba” ta inclui introduccion di un moratorio pa hotelnan y proteccion di naturalesa. Parlamentario Tromp-lee ta consciente di e echo cu e gobierno anterior a haci cierto promesanan y si tur esakinan mester keda ehecuta nos lo ta papia di mas cu 7000 camber adicional. Esaki sigur ta algo cu nos pais no por carga.

P’esey mes durante di tratamento di presupuesto ya caba e problematica y preocupacionnan mara na esaki a keda presenta. Alavez mediante un mocion a urgi gobierno pa laga haci un analisis di e consecuencianan di cancelacion di cualkier promesa haci door di e gobierno anterior. Mas cu claro pa haya un bista mas concreto mester compara e resultado di e analisis aki cu e consecuencianan cu realisacion di e ampliacionnan menciona lo tin pa nos pais y comunidad.

Parlamentario Tromp-Lee ta spera cu Gobierno lo presenta e analisis aki y alavez lo por informa Parlamento cuanto camber lo keda contrui den e añanan nos dilanti.

- Advertisement -

DUNA COMENTARIO

Please enter your comment!
Please enter your name here