Home Hudicial Tin un Canades cera pa traficacion di 3 kilo di marihuana y...

Tin un Canades cera pa traficacion di 3 kilo di marihuana y 1 kilo di cocaina

172
0
SHARE
- Advertisement -

ORANJESTAD (AAN): Awor a bin sali na cla, cu tin un homber Canades actualmente cera den Prison di KIA, pendiente di e caso penal cu Ministerio Publico a cuminsa contra dje.

E ta wordo considera door di varios grupo di baho mundo na Aruba, como “e homber grandi” envolvi den importacion y exportacion di droga pa Aruba, y di tur tipo.  Incluyendo e droga ecstasy.

Sinembargo door di Ministerio Publico di Aruba, e ta djis wordo acusa di traficacion di kilonan di marihuana y cocaina. Su caso lo bin dilanti na November 2018 venidero.

E homber J.Mc.K.E. di Canada, recien a presenta dilanti Hues pa e casonan penal cu Ministerio Publico a cuminsa contra dje.

TRAFICACION DI DROGA:

E persona aki procedente di Toronto, Canada, tabata drenta Aruba na diferente ocasion den pasado como turista.  Rapidamente el a bira conoci como un dealer local cu tabata suministra diferente rebendedor riba Aruba, cu droga cu mas ta circula.

Aunke e tabata riba ‘radar’ di autoridad, tog el a mantene su mes bon scondi, ta cambia constant di adres di hospedahe riba e isla, etc.

E acusacionnan cu Fiscal a presenta contra e sospechoso J.Mc.K.E. ta cu e tabatin mas o menos 3 Kilo di marihuana cun’e riba Diamars 3 April 2018. Esaki ta worde considera como Importacion di Droga prohibi.

Tambe Fiscal ta acusa J.Mc.K.E. cu riba 1 October 2017, el a exporta 1 kilo cocaina.

CASO POSPONI:

Fiscal a bisa cu e caso ta pro-forma pasobra Corte di Husticia ta den e temporada di receso. El a pidi Hues pa pospone e caso te Diabierna dia 2 November 2018.

Abogado di e sospechoso a bay di acuerdo. Hues a bisa cu e ta pospone e caso te dia 2 November 2018 pa 9’or di mainta.

E acusacion cu Fiscal a presenta den Corte ta mustra cu J.Mc.K.E. for di 2017 a cuminsa den e mundo di traficacion caminda el a hiba 1 kilo di cocaina for di Aruba pa Canada.   Esey ta apenas 1 di e casonan cu Husticia a haya sa di dje, y tine confirma.

Sinembargo tin indicacion, cu ya for di 2016 caba e Canades aki tabata envolvi activamente den traficacion na Aruba.

Pa colmo, na luna di Mei 2017 el a keda deteni pa algun tempo, sospecha di ta envolvi den e caso di asesinato di e Canades Asiatico, cu a wordo tira mata na Jaburibari.  Nan a lage bay despues pasobra no tabatin prueba contra dje.

Pero awor na 2018 si e ta deteni, y lo keda cera pa basta tempo.  Y si acaso e haya castigo di prison, e lo wordo deporta di e isla despues di sinta su castigo.

Den e mundo di traficacion di droga, Aruba hopi biaha ta worde usa como e trampolin pa e droga yega sea Merca of Europa.

COMBATI TRAFICACION:

Door cu Aruba tin un aeropuerto internacional reconoci y hopi coneccion di vuelo, ta haci cu traficantenan ta usa nos isla pa importa y exporta droga. Nos isla ta rondona di laman, cual ta haci cu traficantenan ta busca manera ta trece droga na nos isla via botonan.

Ta hopi caso a tuma lugar den Corte di cargamento grandi di droga cu miembronan di Douane y miembronan di Guarda Costa ta haya abordo di botonan cu ta purba drenta cu esaki.

Tanto Guarda Costa como Douane ultimo añanan a bin ta confisca cantidadnan grandi di droga, haciendo uso di nan tecnologianan. Douane ta haci hopi uso di e cachonan anti droga mientras cu Guarda Costa ta depende hopi riba nos radar.

Ademas, Polis hopi biaha ta haya informacionnan valioso di personanan cu ta pidi pa keda anonimo. Hopi biaha ta hendenan cu tambe lo ta envolvi den traficacion y pasobra un otro lo ta formando competencia, nan ta busca manera di par’e.

Tambe ta conoci pa autoridadnan cu tin traficantenan ta usa cantidad di mula y ta usa un di nan como esun cu lo mester cay pa asina desvia atencion di autoridad y e otronan ta pasa.

E aña aki den Corte a trata varios caso di cantidadnan grandi di droga cu a keda haya riba botonan. Esey ta duna señal cu e sistema ta funcionando contra e cantidad di droga cu keto bay ta menaza nos isla.

 

- Advertisement -

DUNA COMENTARIO

Please enter your comment!
Please enter your name here