Home Cultura Tremendo Bariofest Diadomingo awor 26 di Augustus den Centro di Bario Dakota

Tremendo Bariofest Diadomingo awor 26 di Augustus den Centro di Bario Dakota

38
0
SHARE
- Advertisement -

ORANJESTAD (AAN) – Den conferencia di prensa, sr. Stanley Dabian, Relacionista Publico di Departamento di Cultura y tambe parti di e team dinamico di Special Projects Aruba, a duna informacion tocante e evento “Bariofest”  cu lo tuma lugar na Dakota, Diadomingo awor 26 di Augustus den Centro di Bario Dakota, di 10 or di mainta pa 5 or di atardi.

Dabian a menciona cu nan ta hopi contento di ta dilanti porta di un evento grandi y cu e biaha aki ta toca turno na Centro di Bario Dakota.

Durante e evento aki e publico por haya informacion di diferente instancia di gobierno cu ta bay participa y tambe por wak e exposicion riba e parkeerplats di nan productonan.

Entre otro lo tin benta di e buki “Historia di Canashito” cu un baluarte di Canashito a caba di skirbi y publica.

Ademas lo tin benta di cuminda tipico di diferente cultura, entre nan Portugal, Santo Domingo, Filipina, Suriname y Aruba. Fuera di esey e mercado di Santa Rosa lo tey.

Tambe lo tin reconocimento na baluartenan Dakotero unda lo tin cinco nominado. Como baluarte den futbol tanto local como internacional, tin señor Hubert Richardson ken tambe a duna hopi na e bario; Agustin Teodorus Bernabella tambe nomina riba tereno di futbol y tambe na 1964 tabata dirigi e prome team antiyano RCA; Ceslin Yarzagaray ken ta un instructor di baile y ta dirigi e grupo Arudanza, y cu a gana competencia di baile di salsa y tambe tabata señora Carnaval y a representa Aruba na Rincon na Bonaire; Amado Rosina pa tur loke el a haci riba tereno di deporte y musica; Fredy Carlos Tromp cu ta e persona cu mas hende a propone (mas di 30 persona) como baluarte pa su trabao boluntario pa hubentud di Dakota pero tambe den e arte di baile y proyectonan social. El a cuminza cu un grupo di baile cu despues a bira Pop Corn Dancers cu cual tin 29 aña largo.

Stanley Dabian a felicita sr. Tromp di parti di Departamento di Cultura, y di e team di Special Projects cu ta cay bao di Ministerio di Asuntonan Social y Labor.

Dabian a sigui bisa cu durante e Bariofest aki, lo tin Cuerpo di Douane presente, cual ta bay trece informacionnan tanto riba tareanan fiscal y no fiscal di Aruba, y ta bay haci demostracion di nan cacho cu ta e heroenan di tur dia. Tambe lo tin expo-seguridad cu presencia di Polis, Brandweer, K-9 cu su cachonan, DIMAS, Cuerpo Special CEA; Bus di Salud.

Ademas lo tin chekeo di salud door di Wit Gele Kruis, e grupo POH, lo tin control di oido door di FEPO y tambe IBISA lo ta ocupa cu movecion di salud. Y asina tin mas instancia di salud y deportivo cu sr. Dabian a menciona cu lo ta presente. Tambe lo tin entretenimento pa mucha.

Finalmente, sr. Dabian a menciona cu su persona hunto cu Susan Sintjago, Dr. Deyanire Maduro, Lionel Croes, Tania Croes, ta forma e ekipo di Special Projects cu ta realizando e Bariofestnan aki, cu ta parti di e proyecto “Ban Cultiva” cu ta organizando actividadnan pa nos barionan y centronan di bario na henter Aruba.

- Advertisement -

DUNA COMENTARIO

Please enter your comment!
Please enter your name here