Remitido
Sr. Redactor, permiti mi un espacio den DIARIO, pa mi relata e siguiente.
Despues cu mi tin un temporada sin pasa aki banda, den Fin di Siman mi a bay Playa y a confronta cu e siguiente situacion di Señora Husticia cu a perde su balansa y su bendahe cu ta kibra.
Wel ta esaki ta e ehempel cu nos cas di Husticia ta para pe? Ta di e manera aki Husticia ta worde practica?
Ningun hende cu ta traha eyden no a mira e situacion aki y a busca un solucion pa laga drecha esaki?
Mi no kier pensa cu Husticia aki den tambe ta worde practica den e forma aki.
Ta un berguensa pa wak e cos aki, lo no ta miho pa baha of kita e for di su lugar anto? Ni den nos cura di cas nos lo no laga e para kibra asina. Hende local y turista ta pasa henter dia aki dilanti y ta wak nos Señora Husticia den e estado aki.
Por ultimo mi kier pidi un alma den Cas di Husticia pa haci un esfuerzo pa laga drecha e standbeeld aki. Mi ta kere cu e artista cu a traha e lo tin ripara di wak su obra den e estado aki.
Por ultimo no tin ningun forma pa persigui esun cu a kibra of a laga kibra e prestigioso obra aki?
Ciudadano preocupa.
Papilon.
(Nomber conoci
pa Redaccion).
NOTA DI DIARIO: Tabata riba un Diamars 18 di Juli 2017 den oranan di atardi cu un homber a subi e estatua di “Señora Husticia”, a ranca y kibra e balanza for di e cadena, y baha abao cune y core bay cu esaki. Polis a topa cune algun meter mas leu y a detene. Asina autoridad a logra haya e balanza. E homber di inicial D.C. di 29 aña di edad di Sero Patrishi a keda deteni. E material di Balanza ta briya manera oro, pero realmente e no ta di oro. No ta conoci di con ainda aworaki na Augustus 2018, e balanza no a wordo poni bek.
