Home Social Un di cada 4 hende muhe na Aruba ta experiencia un of...

Un di cada 4 hende muhe na Aruba ta experiencia un of mas forma di violencia domestico

29
0
SHARE
- Advertisement -

Lily Marval ta revela datonan di e investigacion nacional

E investigacion nacional riba violencia contra hende muhe na Aruba cu Marval a haci a duna como resultado cu un di cada 4 hende muhe na Aruba ta experiencia un of mas forma di violencia domestico. Esaki ta hopi halto! Y di cada 3 hende muhe 1 ta experencia abuso emocional.

Negligencia tambe ta un forma di abusa di hende, especialmente si nan ta depende di nos, manera un baby, un mucha chikito, un hende cu disabilidad (handicap) manera ciego, sordo mudo; hende grandi cu no por cana bon of cuida nan mes.

MUCHANAN

E formanan aki di Violencia Domestico nos ta wak mas y mas den nos comunidad. Tur juffrouw of meneer di skol por bisa bo cuanto mucha ta bin skol sin bebe un tiki te of come algo.

Muchanan asina neglisha cu hasta ta hole pishi. Tur skol tin un facilitad pa un mucha por tuma un baño. E Fundacion di  John Fun ta traha 600 sandwich pa dia! pa parti na skol pa muchanan cu no tin nada pa come.

Pa motibo di pobresa of negligencia? Dicon e abusonan aki ta tumando luga? E causa por ta difirente cos: e manera con un hende a ser cria. Por ehempel: si un mucha wak su tata maltrata su mama, dia e lo forma un hogar, e lo haci mescos pasobra el a lanta ta wak maltrato y ta kere cu ta algo normal.

Ta yama esey cu e circulo vicioso di violencia ta continua; e ta bay di generacion pa generacion. E forma “Machista” di pensa: homber mag tur cos y hende muhe mester obedece. Y no lubida cu generalmente un abusado ta un hende cu a wordo abusa/maltrata dia e tabata mucha.

Stress di trabou, salario no ta yega pa cubri tur gasto. Placa sigur lo no yega si tin custumber di bebe alcohol, especialmente tur weekend durante Happy Hour. Y menos e ta yega si cuminsa usa droga.

CONSECUENCIANAN

Por wak e consecuencianan: tur dia tin accidente pa motibo di bebemento, especialmente den weekend. Nos isla ta yenando cu mas y mas adicto, homber y muhe. Nos muchanan jong ta cuminsa bebe alcohol y usa droga for di trempan. Wak tempo di Carnaval y fakkeloptocht! Nos sport favorito a bira hunga placa na Casino, hasta pa nos hende grandi cu ta bay benta nan tiki pensioen afo.

Hopi yiu y nietonan NO tin respet mas pa nos hende grandi nan. Mester bay traha, dus ta laga nan na cas cu pampers bisti y sin come te ora ta bin bek for di trabou pa por cambia nan y duna nan algo di come.

Hopi di nan ta diabetico of tin otro malesa. Cuanto biaha no a haya un bieu morto den su stul of riba cama?! Anto miho nos no papia con nos pober bestianan ta wordo trata.

Kico ta pasando na Aruba?? Esaki ta señalnan cu NORMA Y BALORNAN a baha drasticamente na Aruba. Fundeshi di nos comunidad, nos HOGARNAN ta na WERKI!

Pone atencion con nos ta trata otro; con nos ta papia cu otro! Cuminsando for di ariba: mandatarionan cu mester duna e bon ehempel. Bo ta haya miedo pa habri radio. Tur dia tin gritamento, ta usa palabranan onbeschoft, hasta den Parlamento. Mayornan contra yiunan y vice versa; mayornan no tin tempo of no ta tuma tempo pa nan yiunan. Nan no ta puntra con a bay na skol. Y hopi biaha nisikiera nan ta bay busca e rapport.

E investigacion nacional ta mustra cu mas di mitar di hende muhe cu ta traha ta traha mas di 40 hora pa siman. Pesey lo ta bon pa introduci traimerdia obligatorio.

E mucha ta traha su huiswerk na skol, ta lesa buki of sigui un curso expresivo, manera pintamento, handwerken, handenarbeid, gymnastiek etc. Esaki lo tene nos muchanan for di caya. Maestronan contra alumnonan y vice versa. Nos ta campion den copiamento di custumbernan mahos di otro luganan y cu no tin nada di haber cu cultura di nos pueblo.

ARUBA, lanta for di soño! Ban wak realidad. Ban trece cambio. Ban cambia luho y materialismo pa cosnan cu tin balor: respet, compasion y ayudo pa nos prohimo. Proteha bo hogar a base di duna amor na otro. Ban duna mas atencion na otro. Comparti tempo cu otro. Ban busca DIOS no solamente na misa pero den nos actitud pa otro. Ban protehe nos hogarnan y nos yiunan dor di ta un bon ehempel. Ban pone enfasis riba nos propio cultura, norma y balornan. Ban yena nos bida cu cos bunita y cu ta bal la pena.

Cuerpo Policial: por fabor pone tino ora di selecciona esnan cu mester protege nos pueblo. No permiti mal conducta y abuso.

“Den mi rapport di 2013 mi a skirbi cu mitar di nos cuerpo policial tin problemanan relacional na cas! Cada un di nos, di ARIBA te ABOU mester dedica na mehora calidad di BIDA na ARUBA pa di berdad Aruba por ta un isla ehemplar unda ta reina Felicidad berdadero”, Lily Marval a remarca.

 

- Advertisement -

DUNA COMENTARIO

Please enter your comment!
Please enter your name here