ORANJESTAD (AAN): Informacion for di Venezuela, ta indica cu un Corte di Husticia na Caracas a suspende e fin di siman aki, e certamen di beyeza “Miss Venezuela” cu tabata planea pa tuma lugar dia 12 di September venidero, y esaki riba peticion di Veruska Ljubisavljevic, un dama kende a participa aña pasa den e certamen y el a sali prome finalista.
E organizadornan di e certamen, cu ta conoci na e pais como e Fabrica di Reina, a confirma e decision via di un boletin cu nan a duna via social media, unda nan a adverti cu nan no ta comparti ni ta di acuerdo cu e sentencia, pero nan ta obliga di cumpli cune.
E sentencia ta duna orden pa e compania stop mesora cu e organizacion di e certamen. Nan lo bay presenta dilanti Huez tur argumento y defensa pa asina mustra Corte cu e demanda aki ta infunda.
Nan tabatin plan di presenta e candidatanan nobo aki algun dia, pero a stop esaki tambe. Nan ta bisa tambe cu nan ta organiza e evento cumpliendo cu tur rekesito di ley, y cu nan ta adverti, cu nan tambe ta keda cu e derecho di haci demanda pa busca daño y perhuicio cu e sentencia aki ta causa nan.
E candidata Ljubisavljevic a bisa cu aña pasa el a wordo eligi pa representa Venezuela den e certamen Miss World cu lo ta dia 8 di December na China, y e organizadornan a nenga di dune e derecho aki.
Ljubisavljevic a bisa tambe via social media, cu e lo defende loke merece na dje, pasobra aña pasa nan a pone corona riba su cabez, y e sjerp cu e palabranan “Miss Venezuela Mundo”.
E kiermeen cu e ta obliga di baloriza su derechonan como ciudadano, como muher, y como Venezolana, exigiendo pa nan cumpli cune y dune derecho di representa Venezuela den e certamen di Miss World.
E organizacion di Miss Venezuela a cambia di directiva, despues cu algun ex-candidata a haci denuncia, encuanto asunto cu ta haya placa di politico y comerciantenan a cambio di fabornan.
