Home Salud Atrobe holor pisa di Diesel a stroba trabao paden di Hospital

Atrobe holor pisa di Diesel a stroba trabao paden di Hospital

117
0
SHARE
- Advertisement -

ORANJESTAD(AAN): E holor insoportable a bolbe plama den Hospital riba Diamars mainta.

Corectamente personal di Dr. Horacio Oduber Hospital a sali afo y nan ta preocupa cu e situacion di e holo di diesel cu un biaha mas, ta causando molester. Un molester cu for di dialuna caba, a afecta dos departamento di hospital, cual ta radiologia y camber di operacion.

Segun presidente di sindicato ABV, Gina Maduro, mester a para e actividadnan pa e motibo aki, pa asina desaloha luga, pa por proteha tanto trahado como pashent.

Diamars mainta e trahadonan a bin pa eherce nan trabao, pero ainda e luga no a wordo laga liber, cu consecuencia cu e trahadonan mester a bay sinta pafo y warda un rato, te ora cu e luga wordo laga liber.

Miembronan a pone ABV na altura di e situacion. Esaki no ta un situacion di awe, sino e ta bayendo pa un aña caba. E mesun situacion cu ABV mes no ta mirando solucion. Continuamente tin diferente midicion cu a tuma luga, unda cu continuamente cu e mesun resultado cu e no ta dañino. Situacionnan no deseabel ta pasando, unda cu trahadonan tin cu keda traha bao di circunstancia asina. E trahadonan ta fada y ta pa hopi tempo nan ta trahando bao di circunstancianan asina.

Segun Maduro, a papia cu e miembronan. A pone minister Dangui Oduber na altura di e situacion, pero e ta den parlamento. A invit’e pa e bin personalmente pa e mes bin mira e situacion. A mand’e un email unda cu ABV ta pidi un reunion di caracter di urgencia pa sinta cu tur stakeholder pa mira ki solucion tin pa esaki. Mester bin solucion y no por keda asina, segun Maduro.

Den pasado a sinta cu stakeholdernan. A priminti cu lo bin solucion. Tabata tin solucionnan temporalmente, pero cada periodo e problema ta bin bek cu tur consecuencia. Dialuna atrobe e problema a escala, caminda cu no tin control atrobe, unda cu trahadonan y sindicato ta preocupa, pasobra e problema parce no por domin’e ainda. E ta keda un situacion fastioso.

Loke cu ABV kier haci ta mira kico ta e solucion pa awo, pasobra no por keda traha asina. E trahadonan no por keda den situacionnan asina.  Gina Maduro di ABV a splica cu casonan di emergencia por sigui. Na SEH tin un spoed operatiekamer instala caba. Si mester drenta un situacion di emergencia, e pashent ta wordo yuda. Tambe tin un OK 5 si cu ta draai. E OK a wordo laga liber, pa supuestamente no tin nada dañino. Esaki no ta convence ni sindicato ni e trahadonan pasobra no tin garantia cu e luga aki no ta sigur. Continuamente ta e mesun situacion unda cu ta bin midimento, e luga ta wordo laga liber, trabao ta sigui te ora cu bolbe haya e problema. Asina e ta keda. E cos aki ta bayendo pa un aña caba.

Ta fastioso pa traha den situacionnan asina. Segun Maduro, e keho cu e ta haya for di e trahadonan ta dolor di cabes, sacamento, rash, biramento di stoma, wowo ta kima. Esey ta e kehonan cu a haya. Tin hende ta mas gevoelig cu otro. Ta kehonan cu ta drenta mas tanto y tambe problema cu halamento di rosea. Esnan cu tin problema cu asma ta mas vulnerabel pa e situacion aki.

Maduro a pidi pa e director di hospital pa e bin splica kico ta pasando. Nan tambe kier tende kico ta bay wordo haci for di boca di e propio director di hospital. Nan kier tende tambe kico ta bay wordo haci. Den nan concepto, no ta tumando nan na serio. Na cuminsamento trahadonan a cuminsa traha pafo. Nan tabata wordo manda pa traha bek, nan ta bay control via Medwerk, ta sigui un ziektemelding procedure, pero despues e cos ta sigui normal bek, te ora cu e problema bin bek atrobe. Trahadonan awo kier tende for di directiva kico ta bay pasa cu nan y con serio nan tin nan kehonan na pecho. Nan por splica e presidente di e sindicato, pero e trahadonan tambe tin cu wordo splica y ta pendiente pa sinta cu minister y e stakeholdernan mas pronto posibel.

Poco poco ta duna oido na e situacion di e trahadonan. Ta dos departamento crucial di Dr. Horacio Oduber Hospital. Ta un area crucial cu tabata plat, pero solamente emergencia ta wordo atendi. Gina Maduro a splica cu director a papia cu e trahadonan y e opcionnan cu tin awor aki, cual ta tres. Ta dos departamento, cada hefe a bay cu nan departamento y tin tres opcion. Manera e camber di operacion, opcion 1, esun cu si ta sinti cu por traha, ta bay traha bek na operatie kamer. Operatie cinco si ta trahando pa emergencia. Operacion ta bay door. Solamente un camber ta operando. E opcion dos, esun cu ta sinti cu tin keho, cu no por traha, cu ta sinti malo, ta pasa SEH pa wordo registra y ta bay cas y opcion 3, pa esunnan cu tin problema pero por bay otro departamento pa yuda pa traha. E trahadonan aki no ta nenga di traha, nan a bin pa traha, pero door di e situacion laboral nan no por eherce nan trabao. Esey ta pasa cu radiologia tambe.

E problema tabata tey dialuna y diamars ainda tey. E holo, segun Maduro, tabata hopi fuerte. No ta tur trahado ta bira malo, tin mas vulnerabel cu otro. Cu e ta fastioso, e ta.

- Advertisement -

DUNA COMENTARIO

Please enter your comment!
Please enter your name here