Home General Citgo Aruba mester di Un Biyon Dollar

Citgo Aruba mester di Un Biyon Dollar

243
0
SHARE
- Advertisement -

Pruebanan cu mester discuti e acuerdo den foro nacional

Falta di 39 Miyon pa inspeccion a tranca e proyecto

ORANJESTAD (AAN) — Un suma di 650 pa 700 Miyon Dollar lo ta envolvi den e periodo di rehabilitacion pa por pone e refineria den operacion. Mester di un suma adicional di 150 Miyon pa 200 Miyon Dollar pa e tuberia di gas for di Venezuela. Ta papia di un proyecto di Un Biyon Dollar, cu a tranca.  A pidi PDVSA un suma di 300 Miyon Dollar pa cuminsa cu e trabounan cu no por a realisa. Awor ta papia di 39 Miyon pa inspeccion y no pa rehabilitacion te April 2019.

Informantenan ta insisti cu e proyecto Citgo Aruba a demostra di ta un proyecto cu foro nacional mester discuti. Mester evita cu Aruba ta perde credibilidad internacional cu un compania paralisa pa debe.

Na e momentonan aki pueblo no ta ricibi informacion corecto ni completo y no ta capaz na realisa e peliger grandi cu Aruba ta confronta.

INFORMACION INCOMPLETO DENUNCIA CU CIFRA REAL  

Na Augustus 2018 hopi hende a hala un rosea mas trankil ora Gobierno di Aruba a anuncia cu e ta bay papia cu CITGO pa mira kico por spera di e proyecto pa rehabilitacion di e refineria na Aruba. E contesta cu CITGO y PDVSA a duna Aruba no tabata satisfactorio pa un grupo grandi, preocupa cu e situacion di e companianan di estado di Venezuela.

“Mester splica pueblo kico ta pasando pasobra ta den un aventura a hinca Aruba,” informantenan clave a trece dilanti.

Ta solamente ora presenta tur cifra, Pueblo por realisa e berdad espantoso di loke por considera un aventura hasta pa un compania chikito. Aki ta trata di e refineria di Aruba, cu a entrega na CITGO pa un periodo di 25 aña na momento cu e compania madre di CITGO cu ta PDVSA, ta pasa den un di su pio momentonan.

Cifranan real ta mustra cu ta imposibel pa na e momentonan aki, Venezuela cu ta doño di PDVSA ni PDVSA garantisa cu e proyecto por ser realisa.

E informacion cu a duna Aruba despues di e encuentro entre Gobierno y CITGO/PDVSA no ta cuadra cu e totalidad di e proyecto y ta ser considera hasta como un bofon cu ta haci di Aruba, cu aparentemente no sa nada di e posicion horibel cu PDVSA ta pasa aden cu debenan pisa na companianan internacional.

HUUR DI TERENO TA BAHA CU 14.8  MIYON ANUAL 

“Aruba a ser converti en berdad den un rehen di CITGO ora a firma e acuerdonan pa rehabilita e refineria,”  informantenan ta bisa.

Si CITGO perde e terenonan di e refineria cu e tin, Aruba ta haya su mes envolvi den un problema serio pasobra den e acuerdo ta stipula cu a duna CITGO e terenonan na huur pa un periodo di 25 aña.

E huur cu CITGO mester paga anualmente durante e prome tres añanan durante cual lo a rehabilita e refineria lo mester sigui ser aplica durante e proximo añanan?

Den e contracto cu e firma cu CITGO ta menciona cu e huur pa e terenonan di refineria lo ta 18.5 Miyon Dollar anualmente. E contracto ta bisa tambe cu durante e periodo di rehabilitacion di e planta, e huur cu lo ser aplica ta 18.5 Miyon Florin, cu ta 10 Miyon Dollar.

Informacionnan di siman pasa oficialmente ta mustra cu ainda no por papia di rehabilitacion. A cuminsa awor cu inspeccion di e planta pa determina kico rehabilitacion ta exigi.

Esaki lo encera cu por lo pronto e huur anual di e terenonan lo keda 18.5 Miyon florin, cu ta 14.8 florin menos pa aña.

E comision di supervision CAFT a adverti pa e suma di 73 Miyon Florin cu Aruba lo a ricibi menos den su caha pa motibo di e desaroyonan na CITGO.

FORO NACIONAL PA KIBRA SECRESIA

Cu prueba den man informantenan di DIARIO a mustra cu PDVSA no tin placa pa garantisa realisacion di e proyecto na Aruba.

Un expectativa cu no por garantisa, ta ser crea cerca pueblo.  Informacion concreto cu DIARIO ta dispone di dje ta indica cu hasta Arubianonan den exterior kier bolbe nan cas pa traha na un refineria cu te ainda ta riba papel y ta costa Aruba placa.

Un foro nacional so por kibra secresia cu no ta permiti na un pais democratico. E contenido di e acuerdonan tabata hasta cubri den secreto pa Parlamento pa evita cu publico lo a ricibi cierto informacion si politiconan bay bisa pueblo kico a acorda na nomber di pueblo.

Na momento cu CITGO cu ta PDVSA, compania di estado di Venezuela den un crisis financiero historico na America Latino a demostra cu e no ta cumpli cu su contracto, mester a busca un solucion legal.

Na e momentonan aki ta un imagen falso ta mustra pueblo di Aruba cu por haya su mes den un crisis nunca bisto na e pais.

Informantenan ta bisa cu CITGO mester splica si PDVSA a pone e 300 Miyon Dollar cu CITGO a pidi disponibel. E 300 Miyon Dollar ta representa menos cu u tercer parti di e Un Biyon cu e proyecto basicamente lo encera si e no sigui subi den gastonan.

Un situacion hopi serio Aruba ta pasa aden y DIARIO ta sigui en busca di mas informacion pa kibra secresia di informacion cu pueblo no a ricibi for di momento cu a introduci e acuerdo.

- Advertisement -

DUNA COMENTARIO

Please enter your comment!
Please enter your name here