Home Parlamento Despues di 21 aña lo bay tin un investigacion riba tereno di...

Despues di 21 aña lo bay tin un investigacion riba tereno di drogadiccion y salud mental

285
0
SHARE
- Advertisement -

Parlamentario Tevreden di MEP:

ORANJESTAD (AAN)—Diamars, Parlamento a termina su reunion number 22, despues cu miembronan di Staten a yama Gobierno di Aruba y fraccion di MEP a keda satisfecho cu e resultado.

Den conferencia di prensa di fraccion di MEP, Diaranzon mainta, Parlamentario Hendrick Tevreden a expresa cu nan a keda satisfecho di a scucha for di Gobierno con e proceso ta bayendo.

E parlamentario a splica cu pa nan por ehecuta e trabao di controla e presupuesto y e trabao di gobierno, Parlamento a yama Gobierno pa asina percura pa e sistema funciona.

Durante e ocho añanan cu a pasa, segun e parlamentario, Parlamento no a percura pa e trabaonan di control tuma lugar.

El a referi aki na e proyecto di Hospital, e proyecto multimiyonario di Green Corridor, y cu gobierno ta pagando mas di 200 miyon florin na interes pa aña, pa motibo cu Parlamento no a percura pa haci su trabao di controla gobierno.

E parlamentario a subraya cu tanto e fraccion di oposicion como esnan di coalicion, a haci nan preguntanan y un di nan cu el a keda contento y satisfecho pa scucha, ta cu despues di 21 aña ta bay tin, atrobe, un investigacion riba tereno di drogadiccion y salud mental locual ta hopi importante.

Despues cu na aña 1997 un rapport di Fundini hopi popular, kizas esun di mas grandi y importante cu a wordo teni riba e ramo di salud mental. Cifra duna den dicho rapport a mustra cu na Aruba tin mas di 11 mil usador di droga.

Parlamentario Tevreden a señala cu consumo di droga ta un problematica cu ta progresa, y esey por duna di pensa cu kizas den nos poblacion aworaki, por tin mucho mas cu 11 mil usador di droga. Un poblacion cu ta crece y un problema cu ta progresa, por hiba nos na e conclusion aki.

Fraccion di MEP ta contento di a scucha cu Minister di Salud sr. Dangui Oduber, ta bay percura pa e onderzoek aki tuma lugar.

Esaki tin, logicamente, un tempo mara na dje, e mas importante di e onderzoek aki ta cu e lo culmina cu un lista di indicacionnan cu lo wordo combina cu e maneho.

Esaki ta importante pasobra mayoria bez e rapportnan ta bin cu sugerencianan, ideanan, puntonan di mehoracion, etc., pero locual ta pasa ta cu, por ehemplo, ex minister di Asunto Social a traha un rapport “supporting leadership” pero el a hinke den lachi pa cuater aña y na 2017 pueblo di Aruba a confronta un crisis social masha grandi mes.

El a señala cu e implicacionnan cu lo sali for di e onderzoek tocante salud mental y consumo di droga, cual lo dura ocho luna y ta hopi riguroso y den profundidad di e problema, ta cu na final lo por wordo combina cu e maneho. Esaki ta nifica cu esey lo deriva un maneho nobo riba tereno di salud mental y adiccion, loke ta hopi interesante pa esnan cu ta den e ramo aki y esnan cu ta sufri di e problema di adiccion.

E parlamentario, finalmente, a felicita e minister di salud cu a percura pa esaki lo bira un realidad, y aunke lo dura un tempo largo ainda prome cu por haya e resultado final, pero fraccion di MEP ta contento pasobra nan ta confia den e profesionalismo di e personanan cu ta bay realiza e investigacion aki, y por a mira den nan trayectoria for di 1997 unda a yuda Aruba grandemente pa por a set up diferente organizacion y departamento cu ta atende di e tempo ey te awor riba e problema di salud mental y adiccion. No obstante nan ta conciente cu nos poblacion ta den un problema grandi den e era aki, aworaki, y cu mester di un solucion pronto pa e situacion aki.

 

 

 

- Advertisement -

DUNA COMENTARIO

Please enter your comment!
Please enter your name here