ORANJESTAD (AAN): Durante e premiere di e documentario tocante traficacion di hende ‘Promesa Falso’ na Crystal Theater, Paula Nahr, Fundador di Switch Foundation y Producer di e proyecto, a haci entrega di varios reconocimento special pa e team cu a participa den haci e documentario aki un realidad.
Entre e personanan cu a haya reconocimento e anochi aki pa nan diferente rol den e proceso di pre-produccion, produccion y post -produccion di ‘Promesa Falso’ tabata Rafael Barragán.
Rafael a wordo honra diamars anochi cu e posicion di Co-Fundador di Switch Foundation. Barragán durante e añanan aki a destaca pa e tremendo trabao cu e ta realiza como fotografo social/videografo y pa e pasion cu el a pone den tur e proyectonan cu Switch Foundation a realiza te cu awor. 
Tur e otro personanan cu a colabora di un of otro manera pa ‘Promesa Falso’ por a bira un realidad, entre nan: Joshua Verschuur y Ivan Barrera “Caleto” kendenan a traha riba e musicalizacion, Jhon Freddy Montoya y Gloria Bryce (direccion artistico), pa menciona algun, a haya un certificado di reconocimento.
Ta bon pa remarca e tremendo actuacion di e actornan principal Alvin Molina (Marcus) y Genesis Ramirez (Shamere) cu a destaca pa nan caracterizacion di nan personahe, como tambe e otro team di actornan cu di un forma of otro a haci un trabao hopi profesional pa yega na un documentario di e calidad aki. Sin lago afo fotografonan, colaboradornan, sponsor cu a duna nan tremendo aporte. 
SORPRESA!
Durante e premiere esnan presente a wordo sorpresa cu presencia di e famoso actriz Spaño, Luisa Gavasa, kende a gana hopi premio, inclui e “Premios Goya 2016”.
Gavasa ta na Aruba y el a asisti na e estreno mundial di e documentario experimental “Promesa Falso”. El a dirigi algun palabra na e publico, den presencia di e miembronan di Switch Foundation, e elenco y e team di produccion.
Luisa Gavas a traha cu e reconocido cineasta Pedro Almodovar y a wordo elogia pa su pelicula recien “Campeones”. El a destaca e trabao di Switch Foundation, cual a cataloga como uno di calidad internacional.
