Home Policial Hoben di 22 aña hinca mortalmente den Hot Zone

Hoben di 22 aña hinca mortalmente den Hot Zone

1587
0
SHARE
- Advertisement -

ORANJESTAD (AAN): Autoridad hudicial di Aruba a cuminza for di madruga caba ta investigando un asesinato den area di Hot Zone na Palm Beach.  Esey despues cu a haya sa cu un hoben masculino di apenas 22 aña di edad a muri debi na un of mas hinca na su curpa.

Tabata alrededor di 3:30 am, cu un problema a start riba tereno di Sand Aruba (antes conoci como Sand Bar).  Testigonan a bisa cu un pelea a surgi entre dos of mas persona, cu gritamento y pushamento, y diripiente por a mira uno ta core tras di otro.

E personanan envolvi den e confrontamento aki, diripiente a sali for di tereno di Sand Aruba, a cana bay pabao, y drenta riba e parkinglot priva cu tin patras di Arawak Gardens.

Uno di esnan envolvi den e pelea, ta e hoben conoci pa hopi hende como Camilo Sosa.  El a cana bay na su auto sedan color shinishi cu e tin para na e parking di Arawak Gardens.  Tabata parce cu su intencion ta pa aleha di e problema, y bandona e area.

Pero e agresor a yega cerca y bay riba dje na e auto.  E agresor a wordo describi como un persona cu tin cabey un tiki estilo di rasta, pues dreadlocks.  Aki algo a pasa!  Posiblemente e agresor a usa un cuchiu of otro obheto skerpi y largo, pa propina un herida hopi serio na e curpa di Camilo.  E herida tabata net bao di e cocodek.

Camilo a purba core bay atrobe, pero e no a yega leu.  Su movimento motorico di curpa a stop di reacciona, y el a cay mey-mey di e parkinglot, un tiki patras di su auto.  Sanger tabata basha profusamente di su curpa.  E agresor mes posiblemente a susha su Shirt tambe cu sanger, y el a kita esaki pa e keda lomba sunu, y a subi un baki di Pickup color corra kima, y a bandona e area.

Mientras tanto Polis a wordo informa y tabata na caminda pa e lugar.  Mientras tanto un persona cu un vehiculo tipo 4×4, un Jeep Wrangler a yega cerca y a dicidi pa duna yudanza, mirando cu e victima ta sangrando sin stop.

Nan a hise y pone den e baki patras di e Jeep, y cu urgencia a sali rumbo cune pa Servicio di Emergencia na Dr. Horacio Oduber Hospital.

Den un rato di ora nan a yega Hospital, unda mesora personal di Policlinica a drenta den accion, pa stop e sangramento y cuminza reanimacion.  Pero e no a yuda hopi.  Docter di Policlinica mes pa 3:24 am a constata morto di Camilo Alejandro Carreño-Sosa, naci dia 28 di September 1995.

Inmediatamente Polis a sella e area rond di e parkinglot, pa asina tanto Recherche, personal di Departammento di BFTO, y Fiscal por check e situacion.  E curpa di Camilo a wordo confisca pa asina practica autopsia riba dje pa determina e causa exacto di su morto.

Recherche awor tin e mision pa investiga y scucha testigonan, pa haya sa kico a pasa rond di e bar di Sand Aruba, y kico a pasa riba e parkinglot.  Aki sigur, e videonan di Security Cameras lo bay hunga un rol, y sigur yuda autoridad bay pone man riba e asesino cu aworaki ta canando los rond di Aruba.  Tin algun hende cu tin sospecho, ta kende e agresor ta.

Polis a tuma tur prueba den e auto shinishi A-35732 den beslag, incluyendo un potchi cu varios poppy di Marihuana aden, un grinder pa mula marihuana, y demas atributonan pa uso di droga cu tabata supuestamente den e auto cu cual Camilo kier a bandona e lugar cune.

Mientras tanto Polis ta pidi cualkier persona cu por a mira algo pasa, pa yama Tipline di Polis na 111-41 pa asina duna detaye pa yuda resolve e caso lamentable aki.

Camilo semper tabata un persona hopi alegre, social, y stima su famia y amigonan.  For di tempo cu e tabata bishita Colegio San Antonio MAVO, como tambe Colegio EPI, su kring di amistad a crece.  E ta parce di ta un hende cu no tin enemigo.  Y pesey Diadomingo mainta, monton di su amigonan a keda den shock cu e noticia aki.  Nan ta spera cu e agresor wordo gara pronto, pa asina husticia wordo sirbi pa nan como amigonan di Camilo keda den trankilidad.

Na famia y amigonan di Camilo, DIARIO ta extende su mas profundo palabra di condolencia.

 

- Advertisement -

DUNA COMENTARIO

Please enter your comment!
Please enter your name here