ORANJESTAD (AAN) – Pa tuma personal pa dirigi e Buro di Integridad, Minister Presidente tabata para dilanti un dilema, mirando cu den e cuadro di baha gastonan di gobierno, no por tuma personal nobo.
A bin un proposicion pa postpone e proyecto aki te ora gobierno lo por bolbe tuma personal nobo, pero revisando e punto aki e dignatario a bisa no, pasobra e buro aki ta demasiado importante, y den gobierno tin suficiente persona cu lo por yuda den e tereno aki.
Pesey den e luna di September aki, gobierno ta bay habri e solicitudnan interno, pa esnan cu tin interes den e funcionnan cu tin.
E mandatario a splica cu e no ta bay ta un departamento grandi pero un cu ta bay ricibi rapport, cu ta bay coordina y unda pasonan lo wordo tuma.
E dignatario a indica tambe cu den gobierno tin diferente departamento cu ta atende cu e tema di integridad. Por ehemplo, si den un departamento falta placa tin Accountingsdienst cu ta atende cu esaki. Pues, e buro di integridad locual lo haci ta percura pa Accountingsdienst wordo involucra lihe.
Si ta un caso penal di ladronicia di placa, tin Landsrecherche. E Buro Integridad no ta bay haci e trabao di Landsrecherche pero ta bay coordina. Tambe tin e Departamento di Recurso Humano, cu ta esun cu ta bay encarga cu casonan disciplinario. Pues, tin diferente entidad caba y e Buro ta bay coordina.
