Home General Prijs pa consumo di coriente y awa lo por subi cu 20%

Prijs pa consumo di coriente y awa lo por subi cu 20%

135
0
SHARE
- Advertisement -

“Rumor” fuerte ta indica:

ORANJESTAD (AAN): Tin un “rumor” cu entre e luna en curso y December, of mas tarda Januari 2019, prijs pa consumo di coriente y awa lo subi minimo 20%.

E indicacion aki ta saliendo for di seno di instancianan concerni mes, pero na un forma no oficial logicamente y den contacto cu cliente cu ya caba a haya e luna aki mes, un cobranza un poco mas halto cu e lunanan anterior, y sigur riba e parti di coriente.

Manera e dicho ta bisa “entre cielo cu tera, nada ta keda scondi” y pa mas cu gobierno ta keda nenga, indicacion ta cu lo no tin otro opcion.

Na nos redaccion e “rumor” aki a yega, y nos no kier alarma nos comunidad, hamas esey por ta nos intencion, pero ta mihor toch trece esaki dilanti pa despues, si resulta cu si tin aumento di prijs pa e consumidor, e lo no cay manera otro sorpresa pisa manera a sosode cu e aumento di BBO y e BAVP cu a cay di sorpresa.

Un segmento di nos comunidad ta hopi preocupa pasobra e “rumor” aki ta cana den pueblo caba y posiblemente, ora yega asina leu, e ciudadanonan di menos recurso sea cu nan ta biba di salario minimo of ta cobra bijstand lo haya un sorto di ayudo of subsidio, pero, ki hubo di e clase medio?

Ya caba e clase medio a “crimp” hopi, debi na e costo asina halto di bida y salarionan cu a keda stanca pa añanan largo. E cartera di e grupo aki no tin caminda pa rek mas.

Hopi sacrificio mayornan cu tin yiu den edad escolar te avanza, ta haci y nan ta mira cu un entrada di 5 mil of 6 mil florin (si ambos mayor ta traha) a bira poco un famia forma pa dos mayor y dos pa tres yiu, corda si ta un famia mas grandi.

Nan ta e clase cu mas ta carga Aruba su economia, pasobra nan tin hipoteca, un auto pa paga pasobra e ta necesario pa hiba mucha scol, etc. Ta e mayornan cu ta paga un actividad sea deportivo of den e rama di arte pa nan yiunan, esnan cu ta paga mas la coriente, awa, telefon, cable, etc., etc.

E peso di aumento di impuestonan directo ta pisa pa nan caba, y si awor tin cu bay paga 20% mas na awa y coriente, fuera cu e prijs di gasoline of fuel pa nan auto ya a escala na alomenos 300 florin pa luna, ta cu kico nan ta bay keda cune pa come?

E cuminda a bira sumamente costoso caba. Cada luna ta algo menos tin riba lista di compras, pasobra di un manera mester mara faha y tristo ta cu mester sosode den alimentacion.

E pueblo cu ta reaccionando caba riba e “rumor” cu tin, ta hopi disgusta y nan ta yamando na nos redaccion pa laga nan stem resona, pasobra no por ta asina cu un di e promesanan di campaña cu ta wordo reitera cada bez den conferencianan di prensa, cu e prijs di consumo coriente y awa lo no aumenta, y awor debi na aumento di prijs internacional lo resulta cu si lo subi y cu un porcentahe halto y dificil pa pueblo carga, y muy special e clase medio cu ta e weso di lomba di Aruba y cu ta carga mas tanto su economia!!!

 

- Advertisement -

DUNA COMENTARIO

Please enter your comment!
Please enter your name here