Home Cultura Prome fondo particular di Aruba ‘Rialto Pianolab’ a keda inaugura

Prome fondo particular di Aruba ‘Rialto Pianolab’ a keda inaugura

37
0
SHARE
- Advertisement -

ORANJESTAD (AAN): Diasabra anochi riba plenchi MetaCorp Rialto tabata tin un anochi di hubilo caminda a bini hunto pa celebra dos proyecto.

Prins Bernard Cultuurfonds a manda invitacion den cuadro cu e dos proyectonan aki cu ta cay bao di nan cual ta: revelacion oficial di e Rialto Pianolab y un proyecto sorpresa cu honor na ex-gobernador Fredis Refunjol.

Na augustus 2018 Prins Bernard Cultuurfonds a cumpli 65 aña di existencia contando cu participacion di tur seis isla den Caribe Hulandes. Esaki mientras cu tur otro fundacion na 1986, a scoge pa ta separa. Y na ’86 como tambe un bes mas na 10 di october 2010, a keda escogi pa ta separa di otro menos Prins Bernard Cultuurfonds.

“Cultura no ta conoce frontera. Cu hopi orguyo y hopi satisfaccion pero mas ainda cu hopi gratitud nos ta akinan awe nochi. Gratitud pa e echo cu sr. Eduardo de Veer a zorg pa e anochi aki ta posibel anto na diferente manera.  Sigur cu gratitud na e echo cu diferente hende a coopera di bon boluntad pa comparti algo, sea forma di ciencia, profesionalismo tempo of den forma financiero”, señora Alice van Romondt a expresa na inicio di e anochi.

Diasabra anochi despues di a honra ex-gobernador Fredis Refunjol pa su añanan di aporte na nos pais, a sigui na e revelacion di e Rialto Pianolab cu ta un espacio uza pa hendenan di menos recurso por train les di piano.

Manera conoci, e aña aki den luna di mei sr. De Veer tabata un di e ocho Arubianonan cu a haya un homenahe special promovi pa Officier van Oranje Nassau.

Esaki ta un condecoracion brinda na hendenan den relacion cu nan participacion y trabao boluntario na comunidad di Aruba, un condecoracion sigur cu ta refleha e  aporte grandi cu semper sr. De Veer a brinda su comunidad.

Proyecto hopi innovativo:
Sr. Eduardo de Veer a escoge e topico di piano pasobra e tin un pasion special pa musico di piano. Prins Bernard Cultuurfonds a haci un tryout den algun siman atras durante zomer vacantie pa cu e proyecto aki. “E proyecto aki ta algo inovativo cu ta cuarda cu e spirito cu sr. Eduardo de Veer a hiba durante su bida di ta un persona innovativo y un pionero”, segun señora van Romondt.  Musico profesional Carlos Bislip tabata esun cu a bin cu e idea pa bini cu un PianoLab y a coordina henter e proyecto aki.

“Mi a worde acerca door di Alice van Romondt pa duna conseho riba un iniciativa di sr. de Veer cu e kier a inverti den futuro y desaroyo di piano na Aruba. Ami a dicidi di recomenda PianoLab.  E ta un sistema innovativo unda tin tur e pianonan ta pega na un sistema cu e docente por scucha tur hende, unda e muchanan por practica na mesun momento sin stroba otro”, sr. Bislip ta splica.

Un miho desaroyo y futuro di piano na Aruba:
Sr. Bislip ta sigui bisa cu pa mas cu 25 aña caba e tipo di proyecto aki ta algo cu ta standard na universidadnan di musica rond mundo unda tur e diferente cursonan di teoria y harmonia ta worde duna den lesnan asina. “E ta duna mi hopi speranza mirando esaki realisa na Aruba pa e futuro di musica akinan na Aruba. Pasobra lo tin e facilidad unda productornan di musica lo por tin e facilidad pa haya les y guia bao profesionalnan manera debe ser. Y tambe pa siña skirbi nan musica, documenta y publica”, segun sr. Bislip.

“Un gradicimento inmenso pa sr. Eduardo de Veer, Carlos Bislip, tur studiante y docente cu tabata presente y sigur un mira pa futuro. Pasobra si esaki bay bon, e proximo lo ta pa San Nicolas pa crea un lab no necesariamente por ta di piano, pero otro instrumentonan sigur cu nos ta haci falta pa desaroya riba nos isla. E no ta pasobra nos kier competi, pero nos kier añadi na e schoolnan di musica cu tin pa escoge e miho talentonan y sigui desaroya nan”,  señora Romondt ta comenta.

Sr. Bislip ta hopi agradecido na sr. de Veer y Prins Bernard Cultuurfonds pa pone confianza den su persona pa realisa e idea akinan, concluyendo cu: “Mi ta spera tur mucha di Aruba cu ta desea di tuma les di piano, cu no tin un piano of e ambiente na cas no ta permiti nan pa studia, cu nan por bin practica gratuitamente na e PianoLab.”

- Advertisement -

DUNA COMENTARIO

Please enter your comment!
Please enter your name here