Home Hudicial Sospechoso di atraco arma declara liber pa motibo di no tin prueba

Sospechoso di atraco arma declara liber pa motibo di no tin prueba

229
0
SHARE
- Advertisement -

Sla duro pa Ministerio Publico

ORANJESTAD (AAN): Diabierna mainta Fiscal di Ministerio Publico a haya sla duro ora cu Hues a declara un sospechoso di a prepara atraco arma y sospecha di posecion di arma di candela, a worde declara liber. Fiscal a exigi 1 aña y 8 luna di prison pasobra e ta haya e Venezolano A.M.G. culpable. Abogado mr. Carlo a cuestiona e hecho cu no tin prueba convincente y cu e otro sospechoso J. ta tira culpa riba su cliente.

Hues a palabra promer cu 14 September 2018 lo tin sentencia pero el a informa cu e ta dicta sentencia Diabierna. Hues a bisa cu e no ta haya legalmente proba cu A.M.G. ta culpable di e acusacionnan y a declar’e liber.

EXIGENCIA DI FISCAL:

Siman pasa tratamento di e caso a tuma lugar caminda Fiscal a acusa A.M.G. cu riba 16 Januari 2018, el a prepara un atraco y tabata den posecion di un arma di candela.

Fiscal a bisa Hues cu for di investigacion ta mustra cla cu A.M.G. hunto cu J. tabata preparando pa haci atraco arma. Polis a actua na tempo pa evita cu a haci un atraco arma. A scucha yamadanan di cellular y por a ripara cu nan tabata vigila turistanan pa haci atraco.

For di combersacionnan por conclui cu A.M.G. no tabata fungi manera taxi ilegal sino tabata duna instruccionnan na J. pa horta turistanan. No ta importante for di unda e arma a sali y ken ta doño di e arma. E intension tabata pa horta turistanan. Ta un asunto hopi serio. Fiscal a exigi 1 aña y 8 luna di prison.

   ABOGADO:

Abogado mr. Carlo a bisa Hues cu Fiscal mester demostra cu A.M.G. ta culpable. E ta haya cu no tin suficiente prueba pa condena A.M.G. pa prepara atraco. No a haya A.M.G. cu arma sino cu J. a worde haya cu arma. E abogado ta haya cu mester declara A.M.G. liber.

mr. Carlo a bisa Hues cu ningun caminda por prueba cu A.M.G. a forza hende of a duna instruccion pa haci atraco. Tabatin combersacion entre J. y un otro persona desconoci tocante un arma di candela. A.M.G. no tabata envolvi den e combersacion aki. For di investigacion no por saca afor cu a haya arma den auto di A.M.G., na banda of bou di asiento. No tin ningun prueba cu tabatin preparacion y cu A.M.G. tabatin arma. Ta solamente tin e declaracion di J. contra A.M.G. caminda e ta tira culpa riba A.M.G. Mr. Carlo a conclui pa Hues declara A.M.G. liber.

  SENTENCIA

Diabierna mainta Hues a bisa cu A.M.G. ta worde acusa di a prepara atraco y posecion di arma di candela hunto cu otro. Hues a bisa cu pa loke ta e arma di candela, esaki a worde haya cerca J. ora a detene. J. a bisa Polis cu e arma ta di A.M.G. y cu a haya esaki for di A.M.G. Sinembargo no tin pruebanan di sosten cu ta demostra esey. Hues ta haya cu no por saca afor cu A.M.G. lo tabata sa di e arma y a duna J. esaki. Hues a declara A.M.G. liber di posecion di arma.

Pa loke ta e paña cu J. tabatin bisti cu segun Fiscal lo tabata pa cu atraco, Hues a mustra cu J. a bisa cu e tabatin e paña bisti promer cu a traha plan pa haci atraco. Hues ta haya cu no por bisa cu esakinan tabata pa prepara e atraco. Hues a declara A.M.G. liber pa esaki.

  SOSPECHOSO DECLARA LIBER:

Hues a sigui bisa cu e hecho cu solamente tabatin e intension pa haci atraco door di papia cu J. via cel no ta suficiente. Ley penal no conoce intension pa haci atraco y pesey Hues a declara A.M.G. liber pa tur e acusacionnan.

Manera ta conoci, segun ley penal, Ministerio Publico tin dos siman pa apela e sentencia. Tempo lo mustra si e caso aki lo bay Corte Superior of no. Hecho ta cu pa motibo di prueba, e sospechoso a worde declara liber.

 

- Advertisement -

DUNA COMENTARIO

Please enter your comment!
Please enter your name here