Home Impuesto Tin doñonan di trabao ta registra na SVb, pero no a Departamento...

Tin doñonan di trabao ta registra na SVb, pero no a Departamento di Impuesto

15
0
SHARE
- Advertisement -

ORANJESTAD (AAN): Tin un preocupacion di SVb cu ta sinti cu e cantidad di fondo cu nan tin, no ta yega. Segun directora di Departamento di Impuesto, nan a atende cu e preocupacion aki ta reina na SVb.

Directora di Departamento di Impuesto, Luenne Gomez-Pieters a relata cu nan a sinta diaranson mainta cu un grupo di trabao na Departamento di Impuesto y tambe cu e director di SVb, sr. Edwin Jacobs. Coleganan di SVb tambe tabata presente pa asina por compronde e preocupacion y atende esaki cu diligencia, mirando kico ta e preocupacion cu nan tin.

A analisa e cifranan, y si compara esaki cu e cifra nan di aña pasa di e primanan di SVb, ta ripara cu tin un diferencia den entrada entre 2017 y 2018. E reunion a bay den un bon esfera, caminda cu por a intercambia preocupacionnan di cada dos departamento y por a compronde y señala algun motibo di e discrepancia aki. SVb ta menciona cu tin 3.651 empleo nobo, 69 dunador di trabao nobo y 1.654 trahado nobo den e bestand di SVb.

Loke ta sospecha cu ta pasando ta cu posiblemente e doñonan di trabao aki ta registra na SVb, pero no ta bin registra nan mes na Departamento di Impuesto. Consecuentemente e entrada di e primanan ta keda atras. A yega na palabracion nan concreto cu ta bay intercambia informacion di e sistemanan automatisa riba corto plazo, caminda cu por identifica unda tin e gapnan den e bestandnan pa asina por bay atende cu e grupo aki cu posiblemente no ta registra na Departamento di Impuesto.

Un otro punto di atencion tambe cu mester señala ta cu no tur ora e doñonan di trabao ta haci pago di loonbelasting y prima nan AOV/AWW y AZV di e manera corecto ora nan paga online via e onlinebanking y/of transfer. Ta tira ful e pago ariba loonbelasting y na final Departamento di Impuesto tin e trabao pa mira, a base di e aangifte cu ta wordo entrega, con e alocacion di e pago mester ta.

Esey ta wanta man y esey tambe ta trece cun’e cu e alocacion mester wordo ahusta. Ta yamando caba e doñonan di trabao caminda cu esaki ta sosode pa por atende nan ariba e punto aki y pa por evita cu ta duna instancia nan mas trabao cu ta necesario. Si e pago sosode manera mester ta, no tin mester di bay haci investigacion pa bay wak kico a pasa y dicon e alocacion ta un tiki for di luga.

Tur luna ta controla esaki prome cu raporta e entradanan y ta haci e coreccionnan cu mester wordo haci, pa asina por raporta di e miho manera. Asina tur hende tin bista tambe kico ta drenta na belasting y na primanan di SVb y tambe AZV. No mester lubida cu ta un aangifte cu ta trata tres diferente entrada cu ta wordo raporta tambe separa. E ta un cos cu Departamento di Impuesto tambe ta preocupa cun’e.

Ta sumamente positivo cu a corto plazo por a tene un reunion cu director di SVb. E reunion a bay den hopi bon esfera caminda cu por a yega tambe na pasonan concreto pa por mira kico ta pasando y bin cu un solucion. Na final e ta bay pa e resultado y pa asina tur dos instancia por ta trankilo ora ta trata e entradanan.

 

 

- Advertisement -

DUNA COMENTARIO

Please enter your comment!
Please enter your name here