Home Enseñanza Varios scol na Aruba kier bira scol saludabel

Varios scol na Aruba kier bira scol saludabel

22
0
SHARE
- Advertisement -

Interes grandi pa scol saludabel

ORANJESTAD  (AAN): Aña escolar nobo a cuminsa cu hopi animo. Scol Saludabel kier informa comunidad, scolnan preparatorio y basico en particular cu e trabou ta sigui den un forma positivo y constructivo.

E concepto Scol Saludabel a wordo desaroya y publica na aña 1995 riba iniciativa di World Health Organization (WHO). Meta di Scol Saludabel ta pa mehora e salud fisico, mental y emocional di e studiante, e personal di e scol, e famia y demas miembro di e comunidad, pa medio di e scol. Aruba a cuminsa traha na aña 2012 den un forma oficial riba e proyecto di Scol Saludabel pa analisa con esaki lo por wordo implementa na Aruba.

Prome a instala un grupo di trabou, cu miembronan di diferente departamento y instancia pa traha riba e miho manera pa introduci e concepto di Scol Saludabel. Despues a instala un grupo pa guia e 5 scolnan piloto cu a traha durante 3 aña cu e proyecto. E grupo di trabou Scol Saludabel ta consisti di funcionarionan di Departamento di Enseñansa (DEA), Departamento di Asunto Social (DAS), Departamento di Salud Publico (DVG), Instituto Pedagogico Arubano (IPA) y Instituto Biba Saludabel y Activo (IBiSA). Ora e fase piloto a termina aña pasa, a lansa e Proyecto Scol Saludabel oficialmente na september 2017 pa tur scol.

E scolnan preparatorio y basico presente na e ‘launching’ oficial a haya informacion amplio tocante e proyecto y su temanan. Ademas nan a ricibi e prome manual cu ta splica con pa implementa Scol Saludabel na nan scol. Despues di e lansamento e grupo di trabou a sigui traha pa finalisa e procesonan organisatorio di Scol Saludabel. Tambe nan a reuni cu diferente departamento y organisacionnan (stakeholders) cu por aporta na Scol Saludabel. Dicho reunion tawatin como meta pa cera conoci cu otro y pa traha un inventario di tur e material/actividad/programa cu nan tin di ofrece pa cu e temanan di Scol Saludabel.

Mientrastanto e conseheronan di Scol Saludabel (Gezondheidsadviseurs) a reuni cu diferente scol cu ta interesa pa bira un Scol Saludabel. En total tin 11 scol primario (preparatorio y basico) cu e aña nobo aki, esta 2018-2019, lo bay cuminsa e proceso pa bira un Scol Saludabel. Consehero di Scol Saludabel lo duna e scol e apoyo y sosten necesario pa, basa riba e situacion di e scol, yega na fiha e area di prioridad di e scol. Asina ta bay traha riba e tema cu ta pidi mas atencion. Hopi biaha tin e impresion cu Scol Saludabel ta traha solamente cu e temanan di ‘Nutricion’ y ‘ Deporte y Movecion’ , pero e proyecto Scol Saludabel ta mas amplio.

Topiconan cu di un Scol Saludabel ta entre otro: Nutricion, Deporte y Movecion, Bienestar Social-emocional, Higiena, Salud Oral y Oido, Huma, Alcohol y Droga, Relacion y Sexualidad, Siguridad fisico y medioambiente.

Estudionan ta comproba cu un alumno di un Scol Saludabel ta siña miho na scol. Den termino largo e ta yuda forma ciudadanonan mas feliz, productivo y cu ta hiba un estilo di biba mas saludabel. Tur esaki ta contribui na un comunidad mas harmonioso y alabes ta baha gastonan pa cu cuido medico. Grupo di trabou Scol Saludabel ta desea tur scol, alumno y mayornan un aña escolar feliz y exitoso.

Alabes nos kier encurasha nos scolnan pa scoge pa bira un Scol Saludabel.

Pa mas informacion tocante scol saludabel por tuma contacto cu  sra. Miriam Baiz na telefon 593-5909 of sra. Swinda Dumfries na 522-4200.

 

 

- Advertisement -

DUNA COMENTARIO

Please enter your comment!
Please enter your name here