Home Deporte Culminacion di temporada di competencia pa Sarah-Quita Offringa

Culminacion di temporada di competencia pa Sarah-Quita Offringa

82
0
SHARE
- Advertisement -

ORANJESTAD (AAN) – E evento na Sylt Westerland Waddeneiland na Alemania tabata coronacion di Sarah-Quita su labor den windsurfing unda e ta logra titula campeon di e evento y consecuentemente sub-campeon mundial di PWA.  Aña 2018 tawata un aña decisivo pa cu e disciplinanan cu e mester a competi aden. Ya durante 3 aña e tabata participa den freestyle, slalom y ola. Sin embargo Sarah-Quita kier a enfoca ariba ola y mehora su prestacion y posicion ariba ranking mundial. Como cu na Aruba no tin ola constante e ta train na Sur-Africa y Islas Canarias durante algun luna como preparacion pa e PWA Tour.  E sacrificio ey a duna fruta e aña aki. El a dicidi di baha man den e disciplina di slalom, unda ya e tin 4 titulo mundial y ta opta pa salta Korea y Japon  pero si ta participa na Portugal den slalom y freestyle pareu  unda e ta sali na di dos lugar den slalom y promer lugar den freestyle. Banda di train windsurf y competi e tin cu bai gym diariamente pa mantene su condicion fisico pa evita lesion,  skirbi hopi articulo pa revistanan deportivo aquatico, contesta email,  duna tayer tecnico di windsurfing manera na Norwega y hiba discurso tocante e deporte di windsurf manera na e Feria di Boto na Duesseldorf ultimo. Un periodo di vakantie ta un luho como cu e mester keda train pa mantene y mehora su nivel. E no por cabisha sino e coriente ta bai cu n’e.  E aña aki el a competi na 7 diferente evento esta  Marocco Portugal, Islas Canarias Spaña  (Gran Canaria , Fuerteventura,Tenerife) y Alemania. Di gran inspiracion ta keda e apoyo di su famia, amigonan, conocirnan y paisanonan cu ta manda bon deseonan ariba media social. Pa ta un atleta sobresaliente ta rekeri dedicacion, disciplina y passion pa loke bo ta practica.

Potretnan: www.pwaworldtour.com

 

 

- Advertisement -

DUNA COMENTARIO

Please enter your comment!
Please enter your name here