ORANJESTAD (AAN): Durante entrevista cu Kathy Paskel, directora di DIMAS, personanan cu ta rekeri di permiso, tin cu percura pa cumpli cu e ley di admision. Esey ta nifica cu anualmente lo mester aplica pa un permiso di estadia na Aruba. Na momento cu esaki lo concede, DIMAS ta procede pa duna un permiso tanto riba papel, como den forma di carnet.
E parti di carnet ta haci’e netamente pa facilita e hende cu tin esaki hunto cun’e, cu na momento cu tin instancianan, manera Guarda nos Costa, cu ta encarga cu e control riba e cumplimento cu ley di Admision, nan por comproba cu e estadia ta na ordo. E ta un obligacion pa e personanan aki mustra cu nan tin nan cosnan na ordo y den caso cu nan no por comproba tal, e riesgo cu bo ta core e ora cu lo hibabo pa un luga, unda cu lo bay averigua si bo estadia ta uno valido. Pa esey a suministra e departamento di Guarda nos Costa cu acceso na sistema di DIMAS, unda cu nan por haci cierto investigacion pa mira si e persona en cuestion, cu nan ta bezig ta controla, tin of no tin un estadia legal.
Pa evita e problemanan aki, segun Paskel, e ta un obligacion pa cana cu e carnet, pa mustra cu tin e permiso pa ta na Aruba. Riba dje ta para unda por traha y ta para tambe den ki funcion e persona ta traha. Ta diferente componente cu ta importante pa ora di control pa por mustra esaki y esey ta e carnet.
E carnet ta algo nobo cu DIMAS a bin cun’e na Maart. Desde Maart por bisa cu esnan cu a haci un aplicacion y a haya un contesta y esaki tabata positivo, a haya un carnet unda cu ta mustra cu nan ta legal na Aruba tambe.
Awendia DIMAS a introduci un carnet. Guarda Nos Costa tin acceso pa haya tur dato di esnan cu tin permiso. Den e carnet tin diferente indicacion segun Kathy Paskel. Desde Maartesnan cu a haci un aplicacion pa e permiso ta haya e carnet.
E sistema riba su mes ta canando bon. Loke mester sosode ta cu e hendenan mester custuma cu ta cambiando y no ta mandando necesariamente carta pa informa nan cu nan peticion ta cla y pa recoge. Ta pidiendo clientenan pa nan sigui nan proceso riba website di DIMAS, subiendo www.dimasaruba.aw. Riba e website bo ta subi riba e tracer, pone bo number y bo ta haya sa si bo peticion ta cla y tin algo pa recoge. Tin bastante permiso cu ta cla y ainda tin hende cu falta pa nan pasa busk’e segun Kathy Paskel. Esaki ta un bon recomendacion pa cada un di nan cu tin peticion na DIMAS pa controla nan fase, cu nan peticion ta aden, si tin algo cla, pasa recoge esaki, pa na momento cu tin control, cual cu ta algo rutinario, cu lo por sosode na cualkier empresa y henter aña, cu lo bo por mustra cu bo tin un titulo di estadia legal.
Cuminsa bo proceso na tempo y percura pa ora cu nan haci control, bo por mustra cu bo ta legal na Aruba.
E tempo di espera tin, segun ley 12 siman mas 12 siman. Desde Maart ta midiendo di 4 pa 6 siman. Esey no ta alcansando den un 100% ainda. Ta entre 70 pa 80%. Ta trahando pa mira con pa hisa esey. E ta un trabao den proceso, segun Paskel.
Asina cu cuater siman yega, cuminsa check riba e website, si tin algo cla p’abo.
