ORANJESTAD (AAN): E homber Arubiano A.M. acusa di a estafa 20 persona a admiti tur cos y a pidi disculpa pa loke el a haci. Fiscal a exigi 20 luna di prison di cual 7 luna ta condicional cu un tempo di prueba di 2 aña. Fiscal a bisa cu e 20 luna ta pa e 20 personanan cu A.M. a estafa.
E acusacionnan cu Fiscal a presenta den sala di Corte contra A.M. ta:
(*) 13 Mei 2018 pa 24 Juni 2018, a haci cu ta doño di tereno y cobra personanan pa haya tereno.
(*) falsificacion y desfalco entre October 2017 y 3 Januari 2018 en total 16 persona. E tabata cobra hendenan pa nan haya trabao.
Den sala di Corte tabata presente e damanan N. y W., kendenan tabata victima di bendemento di tereno. Nan a presenta pa haci demanda di daño. Nan a paga pa haya tereno pero no a haya nada.
ESTAFA HENDE PA TERENO:
A.M. tabata haci como sifuera cu e ta doño di tereno y a cobra e damanan N. y W. pa tereno. Hues a puntra A.M. si ta berdad. El a bisa Hues cu el a haci un fayo eynan. E terenonan no ta di dje sino Gobierno. Nan tabata un tempo di su tanta pero no mas.
PERSECUSION FORMAL:
Hues a remarca cu e no ta compronde e reaccion di A.M. ora Polis a bay pa detene. Ta asina cu e dama W. no tabata confia A.M. y a bay Polis haci demanda. A haci palabracion cu A.M. pa bay tereno y agentenan na civil a identifica nan mes. A.M. a dicidi core bay cu su auto, dal contra auto di Polis y sigui core bay. A yega na un hefboom y el a pasa cu e auto door di esaki. A sigui un persecusion formal, caminda A.M. a dal un ciclista cu auto, casi a dal un agente di Polis. Esey a pone cu Polis a busca mas refuerzo. Patruyanan cu sirena a sera caminda y asina mes A.M. a sigui core bay. Polis a sera un retondo y AM. a sigui core. A lo largo el a bay pega den mondi.
Hues a puntra pakico A.M. a actua asina. Segun A.M. el a haya spanto ora e agentenan a bay riba dje. Hues a bisa cu por compronde cu A.M. no a confia, pero na dado momento ora cu patruyanan di Polis a sera caminda tres biaha, toch a sigui core. Esey Hues no ta compronde. A.M. a bisa Hues cu den su spanto el a actua asina.
Hues a mustra cu na 2010, A.M. a worde condena caba pa malversacion.
ESTAFA CANTIDAD DI HENDE:
Hues a bisa cu investigacion ta mustra cu A.M. a laga pasa cu e tabata cabesante di diferente schoolnan. Diferente persona kier a yuda den eneseñanza y a paga A.M. pa lanta schoolnan. A.M. a admiti cu el a haci esaki. El a gaña e hendenan cu e lo bira director di school y personanan a bay inscribi pa haya trabao y paga. A haci diferente testnan cu nan y tur e documentonan tabata falsifica. Hues a mustra cu un amiga a confia den A.M. y a busca hendenan pa bay aplica cerca A.M.
Hues a mustra cu hende a paga A.M. pa laga su tata drecha plafond pero nunca esaki a sosode. Tambe hende a dun’e placa pa bay busca remedi y esey tampoco a sosode. Tambe Hues a mustra cu A.M. a cobra pa duna les di rijbewijs. Hues tambe a mustra cu un hende a duna adelanto pa cumpra un auto pero nunca a haya e auto. Hues a bisa cu el a mira 20 denuncia di hendenan cu a confia den A.M. y el a tuma nan haci. A.M. a bisa Hues cu e ta admiti cu el a haci malo y ta pidi disculpa. El a bisa cu e lo ta dispuesto pa paga e hendenan back. A.M. a bisa cu den KIA e ta hayando ayudo di psycologo pa su problema y ta hayando asistencia pa planea con lo bay paga tur e hendenan back.
Hues a remarca cu A.M. a bisa cu el a siña su les y kier paga e hendenan pero na Maart 2018 el a worde laga liber y despues a bin e denuncia di estafa hende pa tereno. Awor el a bolbe worde encarcela pa esakinan. Segun A.M. el a siña na un forma duro su les. El a bisa Hues cu den KIA nan kier a hink’e cu cuchiu. Awor den KIA e ta hayando ayudo di trahador social. El a cuminsa yora y bisa cu e no ta asina mas y e kier drecha loke el a haci robez.
DEMANDA DI DAÑO:
E dama W. a haci demanda. El a paga 2.400 Florin na A.M. Hues a bisa cu e demanda ta paga 3 mil Florin material y 5 mil Florin inmaterial. E dama W. a splica cu el a fiya 3 mil Florin for di un amiga y mester a paga interes. El a bisa cu el a haci gastonan. El a bisa cu tur biaha A.M. tabata bis’e cosnan pero no ta berdad.
E dama N. a bisa cu a paga 10 mil Florin pa haya tereno.
EXIGENCIA DI FISCAL:
Den Corte, DIARIO a nota con Fiscal a bisa cu na comienzo, e sospechoso A.M. a tuma un postura di ta nenga tur cos pero despues a dicidi na admiti tur cos.
Fiscal a mustra cu A.M. a estafa dos dama pa cumpra tereno cu no ta di A.M. E tereno tabata un tempo di su tanta pero pa hopi tempo caba ta di Gobierno. Fiscal ta haya legalmente proba cu A.M. a estafa e damanan. Pa loke ta e demanda di daño, Fiscal ta haya cu e demanda di daño di N. ta na su lugar y a pidi pa impone medida di pago. Pa W., e suma di 2400 Florin Fiscal a bisa cu e ta aproba y a pidi impone medida di pago. Fiscal a bisa cu no tin suficiente indicacion pa e otro gastonan. E no ta haya suficiente splicacion pa e demanda inmaterial y pesey el a pidi Hues pa declara esey no admisibel.
Fiscal a mustra cu na Januari 2018, A.M. tabata deteni y a worde laga liber y na Maart 2018 atrobe el a worde deteni.
A estafa cantidad di hende pa haya trabao na school como mentor. E personanan a paga sumanan. Na A.M. su cas a haya cantidad di documentonan, certificadonan cu tabata falso y tambe e testnan psycologico. Tambe a haya demanda di dama cu a paga pa trabao y remedinan.
Fiscal a exigi 20 luna di prison di cual 7 luna ta condicional cu un tempo di prueba 2 aña. Na opinion di Fiscal, e 20 luna ta igual na e 20 denuncianan.
DEFENSA ABOGADO:
Abogado mr. Mohamed a bisa Hues cu e casonan ta masha fastioso. El a bisa A.M. cu no tin sentido pa nenga y papia e berdad. El a admiti tur cos. E hecho cu e ta sera ta stroba pa e por paga back. E ta dispuesto pa paga back tur esnan cu el a horta. E ta laga na decision di Hues. A.M. a pidi Hues pa dun’e un chens pa e por traha y paga tur e hendenan cu el a horta. Tambe e kier ayudo di psycologo.
Hues a bisa cu e ta sera tratamento di e caso y lo bay studia e caso y dia 16 November pa 8.15 lo tin sentencia.
