ORANJESTAD (AAN): E panelnan solar mester wordo laba regularmente. Carlos Ras a comenta cu mas limpi e panelnan ta, logicamente mas e ta produci. E ora tin cu bin cu un preventive maintenance plan. Tempo lo bay duna experiencia con frecuente tin cu bay haci mantencion riba dje.
Mirando e cantidad di luna cu e panelnan tin presente, Ras a menciona cu cierto caminda ta wak algun cos. Pero awor aki ta antende cu e contratista principal, cu nan tin cu take care di dje. Pero berdad, nan ta cerca di lama y tin hopi salpeter. Ta algo cu tin cu mantene basta na serio.
E tereno cu e panelnan ta ariba, a hay’e via RdA na cuminsamento di aña pasa pa e proyecto aki.
Sunrise Solar Park ta consisti di 18.480 PV modules. E armamento a dura di Februari pa Juli, mas of menos. E proyecto a bay den fase, caminda cu nan a cuminsa na pega un structura. Una bes cu e structura ta aproba, e ora ta bay cu e instalacion di e PV modulesnan.
Awo cu ta asina leu, diferente team ta yuda den e proyecto aki. Den e parti di structura tin e departamento di WEB, cu ta di inspeccion, cu ta wak con e calidad di structura ta wordo hinca den otro. Una bes cu esaki wordo aproba pa e inspeccion, e ora ta bay door pa instala e PV Modules.
Finalmente por bisa cu e cosnan a cana netjes. Awor aki, pronto lo haya e proyecto total den man di WEB. Ta yegando e fase final y tur hende ta contento cu esaki, segun Ras. Den e proyecto bo ta haya cu hopi reto y tin cu percura pa e bala sigui lora.
E pregunta tabata dicon no tabata tin compania local cu a participa den e proyecto. Pero esaki, manera tur otro proyecto cu WEB ta bin cun’e, ta pasa door di un destaho publico. E compania Spaño cu a gana e proyecto aki, mescos cu varios compania local, a participa. Nan mester a cumpli cu un tenderpakket cu WEB a bin cun’e y esun miho, WEB a scoge, Ras a bisa finalmente.
