ORANJESTAD (AAN): Habitantenan di Isla di Margarita ta harta y fada. Nan a laga sa Diabierna mainta, cu e isla ya tin mas di 48 ora caba sin coriente. E isla ta completamente den un Blackout.
E isla aki ta den estado Nueva Esparta, y desde Diaranzon mainta caba nan a keda sin coriente. Nan ta pasando anochi den scuridad, sin airco, y pa colmo mas problema.
A bin sali na cla, cu servicio di Celular a cay, no tin Internet tampoco. Y e presion di awa a cay bastante. Esaki ta bin debi cu e pompnan pa suministro di awa a stop di funciona, como cu no tin coriento.
E poco personanan cu a logra haya Internet, a hasta cuminza cu un hashtag #Margarita_desconectada, pa referi na e problemanan cu actualmente nan ta confrontando cu servicionan, y cu e blackout. Tur esaki a bin ta deteriora e calidad di bida di esnan na Isla de Margarita.
Loke tin nan mas furioso, ta cu ningun instancia di Gobierno no kier duna informacion, ni ofrece solucion pa cu e problemanan aki. Nan kier sa kico a pasa cu e inversionnan miyonario cu a wordo haci pa instala algun planta di coriente thermo-electrico riba e isla. Nan tambe no ta trahando, y e isla a keda depende di e kabel submarino conectando cu tera Venezolano pa sigui haya coriente.
Hopi anciano no por yega nan apartamento debi cu lift no ta trahando y nan no por subi trapi. Tambe tin hopi Hospital cu tin pacientnan kehando di calor.
Pa colmo, tin keho di cierto area di Isla di Margarita, cu pa un siman caba tabatin problema cu coriente. Y ni kico nan a haci, ningun crew a presenta pa fix e situacion. Tin algun area cu a keda 12 ora sin coriente, pero despues el a bin bek. Pero riba Diaranzon e situacon a empeora y henter e isla a keda scur.
