ORANJESTAD (AAN) — Diasabra tabata e dia unda cu tur e Inspectornan di Departamentonan di Salud di Aruba (IVA) a reuni cu nan coleganan den Reino Hulandes.
Inspectornan di Volksgezondheid Dienst di Aruba, Sint Maarten, Bonaire, Hulanda y Corsow a bin hunto den un importante reunion.
- Dorylee Lopez, den entrevista cu DIARIO a duna nos redaccion, e siguiente relato.
Sra. Lopez a menciona cu durante e reunionnan aki nan por a siña di otro.. Tin situacionnan similar cu ta pasa na Aruba, Corsow y St. Maarten tambe. Caminda uno tin experticio y e otro no y un por sostene otro. Pa IVA, nan tin prioridad pa 2019, y esaki lo wordo presenta na nan tambe. Lo wak unda cu e otronan por yuda IVA pa ehecuta nan puntonan pa 2019.
E dama a señala cu e ultimo dos añanan, IVA a conoce hopi cambio, vooral den e casnan di cuido. IVA a haci dos ronda na e casnan di cuido, tin mehoracion den e situacion, pero ta yega un momento unda cu mester bay na e siguiente paso. Esaki kiermen yega na cierto acuerdonan, kico ta pensa di e personal cu ta trahando den e cas di cuido, cuanto m² un persona tin derecho riba dje den casnan di cuido. Ta bay mas leu, unda cu hunto cu normanan na unda cu conhuntamente cu e veld, nan kier stipula nan, pa garantiza un tipo di calidad den tur cas na Aruba. Y esey ta e siguiente stap cu mester wordo tuma hunto cu e otro Inspectornan, pa wak si e ta algo cu ta pasa na e otro paisnan di Reino tambe.
Sra. Lopez a indica cu den e reunionnan aki, lo pone tur e agendanan hunto, kico ta prioridad, con por yuda otro. Cu si tin un problema, kico por siña di dje. Cada pais tin su dilemanan, pero tur ta hopi similar. Aki ta caminda cu un tin cu siña di otro, pa uni forsa. Tur ta Inspeccionnan chikito, pero hunto ta ripara cu asina nan ta trece pasonan grandi y lihe dilanti.
Aruba tin leynan bieu, por ehemplo, si wak e Landsverordening Geneesmiddelen e ta bieu, pero danki Dios tin e Landsverordening Kwaliteit in de Gezondheidzorg y Ouderenzorg cu ta leynan mas nobo, mas recien. Pero aworaki ta duna interpretacion (invulling) na loke ley ta bisa. Hopi biaha ta “kaderwetten”, cu ta duna e base, pero como Inspeccion ta duna espacio pa yen’e y na “aanleiding” di loke ta wak riba caya, pa asina wak con ta actua. Te asina leu, Sra. mr. Dorylee Lopez, Inspector na IVA.
