Home General Necesidad medico no por ta den man di seguro

Necesidad medico no por ta den man di seguro

127
0
SHARE
- Advertisement -

AZV mester presenta criterio tras di decision

*Experto maneho Salud Publico mester trece cambio 

ORANJESTAD (AAN)Durante ultimo simannan por nota un avalancha di informacion di parti di AZV, caminda decisionnan ta ser tuma sin presentacion di e criterio necesario pa sostene nan.

DIARIO a busca mas informacion riba e declaracion di AZV manera publica den e edicion di ayera y den cual AZV ta trece dilanti cu lo bay atrae mas dokter di cas na Aruba. E ponencia tabata straño sigur pa pashentnan cu mester a cambia di dokter pasobra AZV a termino su contracto cu nan dokter.

Preguntanan cu a surgi tabata tambe basa riba e hecho cu AZV no ta duna indicacion concreto cuanto dokter di cas mester na Aruba y pakico.

CUANTO DOKTER ARUBA MESTER? 

Loke a haci falta den e informacionnan cu AZV a presenta, ta e motibo pakico AZV kier atrae mas dokter di cas y e metodo cu AZV a uza pa por dicidi riba e cantidad di profesionalnan medico cu ta traha na Aruba.

E cifranan cu ta ser presenta, no por ta basa riba loke AZV of segun AZV, publico, lo kier. Tin regla pa dicidi riba e cantidad cu e poblacion di Aruba mester segun e cantidad di casonan cu ta resulta den un bishita na dokter.

Mester haci un sondeo pa determina pakico pashentnan ta bishita consultorio di dokter.  Falta di informacion medico ta influencia e frecuencia pa bishita dokter. Por tin pashent cu mester bishita dokter pasobra nan tin cierto sintomanan pero no ta bay dokter.  Di otro banda, por tin e tendencia di bay dokter pa e minimo preocupacion.

Mester haci un investigacion pa yega na e cifra cuanto dokter Aruba mester si tene cuenta cu e poblacion total, e situacion general di salud, e condicionnan di bida etc.

Ora a establece e cifra, mester dicidi si ta amplia e cantidad di dokternan disponibel pa atende e cantidad di pashentnan di e pais, cu mester establece cuanto dokter mester pa cada Mil habitante di e pais.

No por manda retira dokternan estableci y den cual pashentnan a pone nan confiansa sin un motibo valido y aceptabel den tempo moderno.

DIARIO ta ricibi hopi reclamo riba e hecho cu dokternan den cual pueblo tin confiansa,  ta haya nan retiro di AZV.

E TERENO DI EXPERTO DEN SALUD PUBLICO

Un pregunta cu ta ocupa un luga cada bes mas central, ta relaciona cu e conocemento necesario pa tuma cierto decisionnan.

Salud Publico conoce expertonan cu ta capaz pa determina e necesidadnan di Cuido Medico, cu ta  parti di Salud Publico.

Informacionnan cu DIARIO a obtene ta mustra cu AZV ta un compania di seguro.  No ta normal cu un compania di seguro ta dicidi riba mundo medico.

Un compania di seguro ta un negoshi cu ta ofrece e servicionan di cuido medico na pueblo. E compania por dicidi riba e profesionalnan cu e ta paga pa atende cu su pashentnan, cu na nan turno ta dicidi di cambia di seguro.

Den e situacion di monopolio manera DIARIO a trece na diferente ocasion dilanti, AZV no por dicidi riba su mes cuanto dokter e mester, kico e criterionan pa dokternan den su servicio mester ta, y tur otro asunto cu ta relaciona cu e sector medico.

E hecho cu ta mantene reglanan anticua pa dicidi ken por ta den servicio di AZV, ta demostra cu mester di reorganisacion dirigi pa un experto den Salud Publico.

Ta trata di un estudio special cu ta prepara profesionalnan cu ta bay dirigi Cuido Medico. Por ehempel un Master Public Health ta capaz di establece e necesidad medico pasobra e ta conoci cu e parti administrativo y e parti medico.

E ta conoci cu e relacion cu e mester mantene cu e sector di entre otro mediconan ora e kier tuma cierto decisionnan y e caminda cu e mester cana a base di criterio fiho pa por tuma decision.

E no ta basa su mes riba opinion publico pero ta acerca su tarea como un practica cientifico specifico cu ta duna resultado concreto y positivo pa e pais.

Tur informacion cu DIARIO a ricibi, ta mustra claramente cu mester reorganisa Salud Publico y AZV y mester dicidi riba e caracter di AZV cu no por ta un compania di seguro si e ta dicidi riba calidad medico y personal medico den servicio di Aruba.

- Advertisement -

DUNA COMENTARIO

Please enter your comment!
Please enter your name here