Minister Romero: “E compania no por keda hopi tempo mas sin capitan”
ORANJESTAD (AAN) – Minister Chris Romero, titular di Transporte, Comunicacion y Sector Primario a duna un update tambe, den conferencia di prensa, di e situacion na Arubus.
Un situacion cu el a hereda, el a subraya, pero cu e tin cu asumi un di e realidadnan tristo ta cu actualmente tin mas cu 20 bus para den garashi, cu no a wordo drecha.
E mandatario a referi na un par di siman atras unda despues di un acuerdo mutuo, a yega na un areglo cu sr. Theo Croes, pa laga liber e funcion di director di Arubus.
Minister Romero a expresa cu e no tabata di e facil ey, pero si nan a yega conhuntamente na un areglo cu tur dos a keda satisfecho cune.
E dignatario a subraya cu gobierno a respeta su contract y “that’s it”. Kiermen, ora di tende diferente suma eyfo cu no ta cuadra, e ta haya cu ta bon pa duna informacion corecto. Esaki no a bay sin advies di diferente hurista, segun e dignatario, pa wak cual ta e mihor caminda cu ta beneficia nos pais.
Despues di esey, un bez cu a keda cla a bay den e siguiente fase, unda mester bin cu un director interno tanten haya un director nobo pa Arubus.
Den cuadro di bon gobernacion, segun e dignatario a splica, tin e presidente di hunta di comisario, cu ta esun cu por wordo apunta pa tuma e tarea di e director over, y esey ta loke gobierno a haci.
E tarea aki ta di un par di ora pa siman, pa yuda guia e compania te ora cu yega na e director nobo.
Minister Romero a splica tambe cu pa yega na un director nobo a busca un compania di accounting externo, pasobra no ta Buro Romero ta bay entrevista e candidatonan, pero ta laga expertonan haci esaki y nan ta bay tuma e solicitudnan y haci e entrevistanan.
E otro siman e anuncio lo sali den corantnan unda cu esnan cu ta mira nan perfil refleha den loke gobierno kier di un persona pa bira director, nan por solicita libremente pa e cargo.
Lo haci e seleccion y wak cual ta esunnan mas apto pa asumi e funcion. E mandatario ta spera cu esaki bay mas lihe posible pasobra no por laga un compania pa hopi tempo sin un capitan.
HOPI TRABAO PA HACI:
Minister Romero ta admiti cu den Arubus tin hopi trabao pa haci. Tin hopi tarea cu mester wordo haci internamente, pero no solamente esey; den area di material sigur mester haya hopi atencion.
E dignatario a referi na e proceso pa busca busnan nobo. Den e cuadro aki el a expresa cu tin basta bus para (mas of menos 20) cu ta un problema existente pa hopi aña y cu awor el a hereda. El a reitera cu e busnan cu e ta bay busca lo wordo standardiza. Esaki ta nifica cu e idea ta pa wanta e flota duradero.
Esey ta nifica cu den cada fase ta busca e mesun tipo di bus y esaki ta crea un ambiente unda e mecaniconan ta hopi conoci cu e tipo di busnan y tambe hopi importante, ta e servicio cu esnan cu ta core e busnan aki ta bay duna.
E mesun sistema standard aki Hulanda tambe tine, e mandatario a subraya. Y tin cierto exigencianan pa cu e servicio cu tambe ta hopi importante.
Den otro articulo nos lo sigui elabora riba e tema aki di Arubus.
