Home General Futuro CITGO por ta riba agenda na Moscu

Futuro CITGO por ta riba agenda na Moscu

190
0
SHARE
- Advertisement -

Tercer reunion cumbre Venezuela y Rusia den corto tempo

2018 a fortifica posicion Ruso enfrente Venezuela

ORANJESTAD  (AAN) — Den corto tempo, Venezuela y Russia ta reuni pa discuti situacion financiero di Venezuela cu ta sigui empeora. Despues di dos bishita di delegacionnan financiero y di petroleo di Rusia na Venezuela, awor Presidente Nicolas Maduro a biaha pa Rusia pa discuti e problema di placa cu Venezuela ta confronta. Teniendo na cuenta cu ta asistencia Ruso lo a yuda Venezuela mantene CITGO como propiedad, CITGO lo por ta riba agenda na Moscu. Rusia lo por pidi un parti mas grandi den e compania of por dicidi di transforma su borg den participacion directo den e compania. Aña pasa, Rusia a logra interes den exploracion di gas na Venezuela.

Rusia y China ta e dos paisnan cu mas asistencia ta brinda na Venezuela for di momento cu e pais Latino Americano a cuminsa enfrenta problemanan financiero y economico grandi.  A cambio di e asistencia financiero di e dos paisnan, Venezuela ta entrega petroleo.

E debe grandi cu Venezuela ta acumula na e dos paisnan tabata motibo pa na 2014, Venezuela a otorga casi mita di CITGO como borg na Rusia.

Na augustus 2017 ora Venezuela y Rusia a topa, a ser calcula cu PDVSA tabata debe e compania petrolero di estado Ruso un suma total di 6 Biyon Dollar mientras Venezuela como pais tambe tabata tin un debe cu Rusia.

Durante un encuentro entre Venezuela y Rusia na december 2017, Rusia a haya e derecho di operacion di e minanan di gas Patao y Mejillones dilanti costa Venezolano durante un periodo di 30 aña.

Rosneft a haya e derecho pa bende henter e produccion pa exportacion. Ta trata aki di un contracto sumamente faborabel pa Rusia. Tabata di e forma aki tambe cu Rosneft a bira partner den CITGO na 2014.

Na 2018 na diferente momento Rosneft a mustra interes di cumpra e resto di accionnan den CITGO. Publicacionnan internacional a revela cu e compania estatal Ruso tabata dispuesto pa negocia cu Crystallex pa e por logra bira doño di e parti mayoritario den CITGO, riba cual Crystallex a haya derecho di borg pa medio di Hues.

Na momento cu na dos ocasion durante e ultimo lunanan Venezuela tabata a punto di perde CITGO pa motibo di su debenan, Rusia a bishita Venezuela cu a paga e debenan y asina a sabi di mantene CITGO cu ta hopi importante pa Rusia debi na e hecho cu e ta estableci na Merca.

Aña pasa a keda demostra con fuerte e posicion di Rusia enfrente Venezuela ta, debi na e debenan cu Venezuela mester paga Rusia.

E posicion Ruso a ser fortifica na 2018. Ya Venezuela mester a haci concesionnan na otro parti di mundo caminda el a entrega parti di su propiedadnan como borg na Rusia.

Aruba te ainda ta spera un contesta di CITGO tocante e rehabilitacion di e refineria pa cual awor ta haci inspeccion. No por spera cu Venezuela mes, cu no tin fondo pa mantene su propio refinerianan, lo ta capaz di realisa e proyecto na Aruba, caminda e ta core riesgo tambe cu su propiedadnan ta ser confisca.

Si Rusia logra haya e resto di accionnan den CITGO como borg pa e debenan di Venezuela, ta deshaci di e peligro cu otro companianan cu mester haya placa di Venezuela, ta confisca CITGO of propiedadnan di CITGO.

- Advertisement -

DUNA COMENTARIO

Please enter your comment!
Please enter your name here