Vocero di Departamento di Salud
ORANJESTAD (AAN): Departamento di Salud Publico conhuntamente cu diferente organizacion ta hibando un campaña di concientizacion pa e temporada di carnaval.
Jurette Croes, vocero di DVG a duna di conoce cu esaki ta e campaña “Mi escogencia tin consecuencia. Ta pone hopi atencion riba e importancia di haci un escogencia corecto pa asina e resultado por bira uno positivo, a bisa.
Un e topiconan di e campaña ta embarazo y malesanan transmiti sexualmente. A keda demostra cu durante e temporada aki, e uso di alcohol excesivo, musica fuerte y abuso di diferente substancia ta conduci na un comportacion sexual no mucho responsable y na embarazonan no planea como tambe na malesanan transmiti sexualmente, a enfatiza.
Durante e ultimo dos añanan, Departamento di Salud por a ripara un aumento basta grandi riba e malesanan sexualmente transmiti, esta Chlamydia, Gonorea y Sifilis. E malesanan aki mas tanto ta presenta entre personanan di 25 pa 44 aña. Pero tambe ta wak e grupo di personanan mas jong, entre 12 cu 25 aña cu tambe ta presenta cu e malesanan aki, Croes a duna di conoce.
Esaki ta malesanan cu por wordo cura cu antibiotica, pero esnan cu tin’e mester di tratamento pasobra tambe por tin consecuencianan sino haya e tratamento debido y di e forma aki tambe sigui contagia otro personanan.
Hopi biaha, tin e pensamento cu door cu esaki ta hendenan mas jong, nan tin miedo, nan ta sinti e sintomanan pero nan no ta bay nan doctor di cas ni na Departamento di Malesanan Infeccioso (DBZ) pa nan haci e testnan necesario pa trata e malesanan tempran, a agrega.
Pa loke ta herpes, a indica cu esaki, den nos poblacion un 75% caba tin e virus. Pasobra ta hopi contagioso pero ta esun menos erg.
Relaciona cu HIV, e vocero di DVG a señala cu e cifranan ta basta stabil den e ultimo dos añanan.
Departamento di Malesanan Infeccioso ta haci testnan anonimo. Cualkier persona cu ta sinti algun sintoma, tin duda of cu tabata tin un conducta sexual iresponsabel por pasa na DBZ pa por haci nan testnan completamente anonimo.
Despues di e resultado, nan por haya guia di e departamento y di docternan di cas, a agrega. Ta bezig ta repartiendo condoms pa ofrece proteccion na e poblacion.
