Cu su tema: Ritmo di mi bida
ORANJESTAD (AAN): Tur cos ta cla pa e tremendo proyecto na Community Museum bou nomber di “Compartimi” cual lo tuma lugar awe diasabra 23 di februari.
Tin biaha, tin bida di persona cu por sirbi como ehempel pa un comunidad. Y nos invitado Sr. Frans Croes ta un di nan, awe na bida 100 aña caba.
Sr. Croes, bou guia di Sr. Renwick Heronimo lo comparti cu tur esnan presente hibando nos back den tempo. E ta bay conta un tiki con e aspecto di musica a hunga un rol unificador den su bida.
Semper e por conecta cada etapa di su bida cu un aspecto musical cu tabata den cierto forma un aspecto cu tabata yena su bida y dune e forsa pa sigui den bida. Bin scucha, por ehempel, con el a cuminsa un negoshi na edad di 50 aña. Tambe con el a cuminsa toca guitara cu 70 aña.
E serie di Compartimi ta un bon momento pa crea un registro di e grandinan aki, cu ta cana cu asina hopi informacion y atrabes di entrevistanan asina nos ta logra recolecta y crea un archivo cu tin masha hopi informacion.
Asina aki ta contextualisa cada periodo y schets e ambiente di e momento pa duna e forsa pa nan por corda e sucesonan di pasado. Di tal forma e comunidad por bini hunto den un ambiente relaha pa concientisa y comparti hunto activamente den conservacion di nos historia, artefacto, coleccion, herencia y mucho mas.
Bin scucha, siña y disfruta awe na Sunrise City. Bin conoce cu e storia y bida di Frans Croes. Su bida tabata marca pa diferente momentonan di adversidad cu el a sa semper di duna un bon cara. Bin haya sa con musica a hunga un rol primordial den su bida.
