Home Actividad Especial Ciruhano Cardivascular Dr. José Sprok na cabez di bunita proyecto na Costa...

Ciruhano Cardivascular Dr. José Sprok na cabez di bunita proyecto na Costa Rica

1004
0
SHARE
- Advertisement -

Dr. Sprok a retira for di sala di operacion pa motibo di condicion visual

ORANJESTAD (AAN): For di Costa Rica, DIARIO a haya e grato noticia cu Dr. José Sprok, Ciruhano Cardiovascular, yiu di tera y cu a gradua y traha hopi aña na Hospital San Juan de Dios ubica den e capital di San José, tabata na cabez di un bunita proyecto.

Dr. Sprok a duna di conoce cu esaki ta un proyecto cu el a lidera y e develo a tuma lugar diabierna 8 di Maart. Ta trata di un escultura di San Juan de Dios (santo cu ta cuida e enfermonan) cu ta midi 2,55 meter di altura, ta pisa 318 kilo y ta localiza na e “Plaza de Próceres” den e interior di e Hospital. 

E medico a indica cu esaki tabata un di e proyectonan cu e tabata tin pendiente ora cu el a retira.

Na 2015, a celebra 170 aña di Hospital San Juan de Dios. Na e momento ey a forma un Comision pa e celebracion y a logra cu hopi persona a yuda e institucion cu donacionnan.

Durante e celebracion a bin e pregunta pakico no tabata tin na e hospital un imagen representativo di San Juan de Dios, patron di e centro medico, cual mester menciona ta esun di  mas renombra na Costa Rica.

Di e forma ey a surgi e idea pa traha un estatua pa e hospital y pa e pashentnan. Na cuminzamento e idea tabata mustra inalcansabel, pero conhuntamente cu otro coleganan a analiza e opcionnan, posibel sponsornan y tambe a tuma contacto cu diferente escultor.

~ Pa motibo di su condicion visual, yiu muher di Dr. Sprok a lesa su discurso, durante e ceremonia

Durante varios luna a busca ayudo y a check tambe e posibel artistanan cu lo por a haci e proyecto aki bira un realidad. No tabata algo facil, Dr. Sprok a duna di conoce.

Pero di e forma ey a logra contacta e escultor costaricense José Calvo y hunto cune a inicia e caminda pa concreta e proyecto magnifico aki cu awendia ta un realidad.

RETIRO FOR DI SALA DI OPERACION

Dr. Sprok a laga sa den un entrevista cu DIARIO, cu door di un condicion visual, e mester a retira, ya cu tabata dificil p’e, den su trabao como ciruhano cardiovascular sigui cu e trabao aki. Su condicion visual ta haci cu el a perde nitidez y precision den su vision, el a laga sa.

Sinembargo, mester recalca e tremendo trabao cu Dr. José Sprok a haci, como yiu di tera, trahando na Costa Rica, unda el a haya basta reconocimento y a desempeña pa hopi aña como Hefe di e departamento di Ciruhia Cardiovascular na Hospital San Juan de Dios.

ACUMULANDO MAS EXPERIENCIA

Actualmente, Sprok ta trahando den e tereno administrativo na un hospital priva den pleno crecimento. E ta adkiriendo mas experiencia den loke ta “Hospital Management”, a bisa. Kiermen su experticio te cu awo ta basa den dos tereno, esun publico y priva.

Finalmente, Doctor Sprok a indica cu obviamente no tabata algo facil p’e pasa den e proceso aki pa motibo di su condicion visual, pero cu e sosten di su famia, el a logra sali dilanti.

 

- Advertisement -

DUNA COMENTARIO

Please enter your comment!
Please enter your name here