Home General E liberacion di PDVSA di poder comunista

E liberacion di PDVSA di poder comunista

291
0
SHARE
- Advertisement -

Na añanan Presidente Carlos Andres Perez a lansa e proyecto  “La Gran Venezuela”.

Parti di e plan aki tabata nacionalisacion di industria petrolero cu a uni den Petroleos de Venezuela Sociedad Anonima.

Di e forma aki e industria petrolero no tabata den man di sector priva mas, pero a cay directamente bou estado.

Companianan petrolero internacional a bira partner den companianan nobo. Carlos Andres Perez a adverti mundo contra Hugo Chavez.

Pero e no tabata consciente cu el a habri porta pa e crisis cu Venezuela conoce y pa cual el a adverti.

Awe Presidente Juan Guaidó ta trata na libera PDVSA di comunismo.

Na hopi ocasion, DIARIO a trata di splica cu e crisis Venezolano a haya su origen den e mal uzo cu a ser haci di e sector petrolero di Venezuela.

Awe tur carta ta riba mesa y e berdad tras di e tragedia Venezolano ta bira conoci.

Pa por comprende kico a pasa cu Venezuela, mester bolbe na Hugo Chavez cu a cambia e compania di estado PDVSA den un baluarte di comunismo y militarismo cu ta compaña e sistema socialista.

PDVSA A BIRA SOCIALISMO OF MORTO PA VENEZUELA 

E logo di PDVSA ta papia un palabra cla. “Socialismo of morto” ta ser anuncia na e edificio di PDVSA, cu awor tin dos oficina principal. Uno ta na Venezuela y e otro na Rusia, caminda tur interes financiero di e compania di estado Venezolano a ser hiba durante e crisis actual.

Na momento cu Chavez a asumi control di Venezuela, el a cuminsa cambia e structura di PDVSA cu a bira un instrumento politico cu mester a sirbi e Revolucion Bolivariana y e interes di paisnan comunista.

E entrada enorme cu Venezuela tabata tin na petroleo no a bay pa bienestar di e pueblo, pero a ser uza pa e propositonan di militarisa e pais y finalmente PDVSA mes cu a bira un herment mundial di comunismo/socialismo.

Den e escenario aki, Cuba a cuminsa asisti Venezuela cu creacion di mas poder militar cu a exigi capitalnan enorme di Venezuela. A cambio di asistencia militar, Cuba ta haya petroleo gratis di Venezuela cu a bay asina contra interes di Venezolanonan.

Cu e reservanan di petroleo y gas, Chavez y despues Maduro a crea debenan cerca China y Rusia, cu a haya poder riba Venezuela. Acuerdonan a ser firma cu e dos paisnan cu a haya poder grandi den e sector petrolero.

Industria petrolero y trahadonan rehen di comunismo 

E industria petrolero di Venezuela a bira rehen economico y financiero di e cadena comunista internacional.

E poder total cu China y Rusia, mescos cu paisnan conoci como di subversion internacional a haya na Venezuela, ta enorme.

Mas di 60 Biyon Florin a ser genera for di 2004 pa 2010 dor di PDVSA pero e placa a bay pa asina yama “misionnan Bolivariano” y amigonan di e regimen di Chavez y Maduro.

Na 2002 trahadonan a trata di protesta pero sin resultado. E pais y trahadonan tabata rehen di comunismo y e placa di petroleo a ser uza pa forsa militar kibra tur esfuerso di trahadonan di lanta contra e regimen di Chavez y Maduro, c u a destrui e industria petroleo di Venezuela.

Gruponan grandi di trahadonan cualifica a ser kita di trabou. PDVSA a cuminsa bay atras. E refinerianan no tabata haya mantencion y te awe ta den mal estado.

Trahadonan victima di Chavez ta cu Guaidó

Na 2006, Rafael Ramirez como Minister di Petroleo na Venezuela, a exigi trahadonan dicidi si nan ta sostene Chavez.  Trahadonan cu no tabata di acuerdo cu loke Chavez a haci, a ser kita for di trabou.

Hopi trahado Venezolano mester a bandona Venezuela y a bay traha na refineria na Colombia pa motibo di e maneho cu Hugo Chavez a introduci. Pa trahadonan cu conocemento di nan trabou ademas tabata bisto cu PDVSA lo a pasa den problema serio.

Ora PDVSA a bira un institucion militar cu e solo interes di sirbi paisnan comunista pa asina dirigentenan politico di e pais por a haya forsa, hopi trahado Venezolano a bay busca nan futuro pafo di Venezuela, cu pa falta di trahado capaz y abuso di placa di PDVSA dor di Chavez y Maduro, a bandona nan pais pa traha na entre otro Colombia como experto.

Awe trahadonan den sector petrolero ta sostene Presidente Juan Guaidó, pa baha Maduro y trece cambio pa Venezuela.

Presidente Guaidó kier deshaci di politica pa PDVSA nobo 

Den e plannan di Presidente Juan Guaidó pa Venezuela, e liberacion di Venezuela for di e cadena comunista, ta central. El a mustra cu Venezuela lo busca solucion pa paga China y Rusia e debenan cu Maduro y Chavez a laga atras.

E plan di Presidente Guaidó ta basa riba un maneho cu ta deshaci di e poder politico cu gobernantenan di Venezuela por tin riba PDVSA.

E ta opta pa bini cu un formula nobo pa dirigi petroleo den cual e industria ta ser fortalece cu inversionnan priva den companianan manera originalmente Carlos Andres Perez tabata tin na bista.

Por ta posibel cu e nomber di PDVSA ta ser elimina pa duna inicio na un epoca nobo den e industria petrolero di Venezuela, cu ta realmente un di e paisnan mas rico na mundo si gobierno di e pais uza e rikesanan di e pais pa e pueblo.

E plannan di Juan Guaidó mester deshaci di e militarisacion di PDVSA cu actualmente tin como presidente e minister di Petroleo, Energia, cu tambe ta presidente di OPEC pa Venezuela.

El a ser nombra dor di Maduro, pero nunca a traha den sector petroleo ni tin conocemento di e asunto.

Un epoca nobo lo mester cuminsa pa e sector petrolero di Venezuela, cu ta ser uza contra interes di Venezuela na fabor di e cadena comunista internacional.

E epoca di e liberacion di petroleo for di e opresion di e cadena comunista.

- Advertisement -

DUNA COMENTARIO

Please enter your comment!
Please enter your name here