Minister Presidente mr. Evelyn Wever-Croes:
ORANJESTAD (AAN) – Prome Minister a elabora riba e tema migratorio, den e contexto di e situacion na Venezuela. E mandatario a reacciona riba un comentario cu e ta haya ta na un tono bastante negativo di parti di oposicion, specialmente di parti di señor Benny Sevinger.
E mandatario a subraya cu esaki sin bay den e retorica cu oposicion ta haci politica, pero riba e situacion di e parti migratorio.
“Desde inicio nos a traha hopi duro pa restablece e confianza internacional den nos gobierno y nos ta bayendo den bon direccion. E situacion di Venezuela ta uno cu ta afecta tur hende y nos tambe ta sintiendo e efectonan di esaki.
Gobierno, pa medio pa medio di loke nos ta yama ‘Bureau Rampen Bestrijding’ conhuntamente cu varios departamento, ta trahando constantemente riba un plan cu nos ta trece den un cuadro diferente escenario cu por pasa. E plan aki tambe tin su aspecto financiero, y mirando cu e parti aki pa Aruba ta precario, y ta conoci cu nos tin supervision financiero, nos ta bay haci un peticion financiero pa ayudo den exterior”, e dignatario a duna di conoce.
E mandatario a agrega cu sr. Sevinger no ta critico riba esaki y por bisa cu gobierno a haci su trabao y a pone su contactonan caba na Nacionnan Uni, na Union Europeo, pa asina por yega na fondonan.
El a agrega cu Union Europeo a aproba un peticion cu gobierno a haci siman pasa, cual sinembargo ta pa asistencia tecnico, pa yuda Aruba cu experticio, pa train hendenan local mes, pa yuda gobierno den e proceso di asilo loke nan a honra tambe, y aworaki gobierno ta spera cu ora e presenta su “prijs carchi” nan tambe honra esey tambe.
“Biniendo na e tema bek mi ta kere cu esaki ta momentonan cu nos tur ta enfrentando un crisis grandi, y pa politica partidista manera sr. Sevinger ta hibando no tin lugar pe aworaki. Di akinan lo mi kier haci ta un apelacion na oposicion, pa nos uni y hunto enfrenta e retonan aki”, e dignatario a expresa.
El añadi cu tempo cu MEP tabata den oposicion, nan a haci asina. Prome Minister a subraya cu e tema ta delicado pa tur hende bay polariza riba dje.
El a splica cu e plannan cu tin aworaki ta esnan cu tabata tin riba mesa na 2016 cu algun cambio den dje cu ainda mester wordo aproba pa instancianan internacional, cu tin cu duna e apoyo financiero, pues e ta den preparacion constante pa varios aña ta tuma su tempo y e ta un tema hopi serio.
El a subraya cu e tema migratorio di Venezuela tin gobierno hopi preocupa y e tin un ekipo cu a keda apunta pa studia e situacion di Venezuela, pa asina Aruba ta mihor prepara.
