Home General Merca a scapa negoshi Citgo Aruba

Merca a scapa negoshi Citgo Aruba

174
0
SHARE
- Advertisement -

Presidente Juan Guaidó a kita Citgo di PDVSA

*Aruba no ta comparti caida internacional di PDVSA

*Citgo Aruba por sigui negoshi local den combustibel

 ORANJESTAD  (AAN) –Mientras Aruba ta prepara pa celebracion di Dia di Himno y Bandera,  e siman ta cera cu e confirmacion cu Merca a scapa Aruba di un problema serio pa cual DIARIO a adverti.

A base di e acuerdo cu Gobierno Mike Eman a firma cu Nicolas Maduro,  e negoshi local di combustibel na Aruba a ser kita for di Valero y entrega na Citgo.

Mientras Nicolas Maduro no por a cumpli cu e contracto, el a haya e benta di productonan petrolero na Aruba. Si Guaidó no a kita Citgo for di Maduro, awe e negoshi di combustibel na Aruba lo tabata den problema serio.

Ningun hende ni instancia por bisa cuanto tempo lo dura pa e situacion na Venezuela haya un solucion debi na su caracter compleho. Esaki ta haci cu Citgo Aruba no por mara e reservanan cu e tin na tempo. Loke si Citgo Aruba por haci awor, ta notifica Aruba cu Gobierno di Merca a scapa Aruba di un problema serio.

Manera DIARIO a informa su lectornan, Aruba a ser hinca den un riesgo enorme cu e proyecto refineria cu Gobierno Mike Eman II a cera cu Nicolas Maduro. Esaki no solamente debi na e hecho cu e proyecto refineria no por a ser realisa, pero tambe na e forma cu a entrega Nicolas Maduro e mercado di combustibel di Aruba.

Mientras PDVSA ta den situacion internacional sumamente serio y ayera India cu tabata sostene PDVSA ainda a stop cu entrega di petroleo na Venezuela,  e mercado di azeta ta bira mas chikito pa produccion Venezolano.

Citgo tabata parti di PDVSA pero a scapa na momento cu Presidente Juan Guaidó a tuma posesion di Citgo y a los e compania for di PDVSA.

A base di e hecho aki, Merca a dicidi cu Citgo no ta cay mas bou e medidanan economico cu el a tuma y cu ta prohibi comercio entre companianan Mericano y PDVSA.

Manera DIARIO a anuncia na forma di primicia dia 22 di februari,  Presidente Guaidó a reemplasa e gerencia di Chavez na Citgo, cu a keda awor e compania mama di Citgo Aruba.

Na momento cu Merca a tuma e decision cu Citgo no ta ser considera mas un compania Venezolano y no ta cay bou e medidanan cu el a tuma contra PDVSA, companianan Mericano por sigui haci negoshi cu Citgo, cu no por cumpra productonan di Venezuela.

Esaki ta encera, cu si ta necesario Citgo por alimenta e negoshi den combustibel na Aruba cu petroleo cu e ta cumpra cerca otro paisnan.

E situacion nobo ta duna asina siguransa cu Aruba por sigui importa productonan cu ta sumamente scars na Venezuela cu tin problema serio cu su produccion di productonan petrolero manera combustibel.

Na e momentonan aki informacion corecto ta sumamente importante pa Aruba, cu a ser hinca den un situacion internacional hopi peligroso pa su situacion economico, financiero y social.

Entrada di Citgo na Aruba na momento di riesgo grandi, no tabata visibel pa Pueblo di Aruba cu a scapa di problemanan grandi cu transporte local y entrega di combustibel na avionnan y barconan.

Si Citgo Aruba  a cay bou e medidanan cu ta afecta PDVSA, Aruba lo tabata parti di un desaster total.

 

- Advertisement -

DUNA COMENTARIO

Please enter your comment!
Please enter your name here